Қаңғыбас иттер мәселесі: Экология министрі Тоқаевтың сынына пікір білдірді

Экология және табиғи ресурстар министрі Зүлфия Сүлейменова Президент Тоқаевтың қаңғыбас иттерге байланысты айтқан сынына қатысты ойын айтты, деп хабарлайды BAQ.KZ тілшісі.

Бұған дейін Мемлекет басшысы Қасым-Жомарт Тоқаев өңірлерден қайғыбас иттерге қатысты арыз-шағымдар жекесіне жиі түсетінін айтқан болатын.

Шын мәнінде (қаңғыбас иттерге қатысты – ред.) арыз-шағымдар бар. Бұл мәселені көре тұра үнсіз қалуымыз керек пе? Бастысы осы. Экология министрлігінің жедел желіні құрғандағы мақсаттарының бірі де түсетін арыз-шағымдардың көптігі себебінен, - деді министр.

Зүлфия Сүлейменова жедел желіге қандай арыздар түсетінін айтты.

Арыз-шағымдар әртүрлі болады. Мысалы, жануарларға қатыгездік танытуға, кейде керісінше жануарлардың адамдарға шабуылдауына, иелерінің үлкен иттерді босатып (өз еркімен қыдыруға – ред.) жіберуіне қатысты. Себебі кейде бұл иттер адамдарға тап беріп жатады. Мұндай мәселелерді үнсіз қалдырмай, шешу қажет, - деп пікір білдірді Экологиямині басшысы Үкіметтің кулуарында.

Бүгін Үкіметте Президенттің төрағалығымен еліміздің әлеуметтік-экономикалық дамуы жөнінде кеңес өтті. Кеңес барысында Мемлекет басшысы Қасым-Жомарт Тоқаев еліміздегі білім саласын сынға алып, білімді қалай объективті бағалау керегін ойластыруды тапсырды.