Президенттік жастар кадр резервіне қабылдауға 1251 өтінім келіп түсті

Нұр-Сұлтан, BAQ.KZ. Мемлекет басшысының тапсырмасына сәйкес ағымдағы жылы Президенттік жастар кадр резервіне 50 резервші іріктелетін болады. 

Бұл туралы ҚР Мемлекеттік қызмет істері агенттігінің ресми өкілі Ерхан Таткен хабарлады.

Құжаттарды қабылдау ағымдағы жылдың 1 қыркүйегінен бастап pkrezerv.gov.kz цифрлық платформада онлайн режимде басталған болатын.

Құжаттарды қабылдаудың екі күні ішінде іріктеуге қатысуға 1251 өтінім келіп түсті. Құжаттарды қабылдау 30 қыкүйекке дейін жалғасады.

Президенттің 2021 жылғы 29 тамыздағы № 141 Жарлығымен белгіленген талаптарға сәйкес іріктеуге 35 жастан аспаған, жоғары білімі және 5 жылдан кем емес жұмыс өтілі бар, сондай-ақ мемлекеттік тілді ортадан төмен емес деңгейде білетін Қазақстан Республикасының азаматтары қатыса алады. Резервте болу мерзімі 3 жыл. 

Резервшіні бос мемлекеттік лауазымға тағайындау қолданыстағы заңнамаға сәйкес жүзеге асырылатын болады. 

Біздің елімізді одан әрі дамуы мен гүлденуіне үлес қосуға дайын және қабілетті барлық азаматты Президенттік Жастар кадрлық резервіне кезекті іріктеуге қатысуға шақырамыз, - деді ол.