Президент Қостанайдағы орман өртінен зардап шеккен азаматтармен кездесті

Шұғыл әрекет ету штабы отырысынан кейін Мемлекет басшысы Қасым-Жомарт Тоқаев орман өртінен зардап шеккен Аманқарағай ауылының аумағын аралады, деп хабарлайды BAQ.KZ.

Ақорданың ресми сайтының мәліметінше Мемлекет басшысы Әулиекөл ауылындағы мектепте орналасқан эвакуациялау пунктінде зардап шеккен азаматтармен кездесіп, гуманитарлық көмек тарату пунктіне барды.

Зардап шеккендермен кездесу барысында Қасым-Жомарт Тоқаев Үкімет қиын жағдайды еңсеру үшін барлық шараларды қабылдайтынын айтты.

Өкінішке қарай, үлкен өрт болды. Дегенмен тиісті көмек көрсетіледі. Сіздердің баспанасыз қалғандарыңызды білемін. Үкімет екі, екі жарым айда сіздерге бұрынғыдан әлдеқайда жақсы жаңа үйлер салып береді, – деді Мемлекет басшысы.

Президент еріктілермен әңгімелесіп, оларға көрсеткен көмегі үшін алғыс айтты.