Президент: Карантин шараларын қатаң ұстансақ қана індеттен құтыламыз

Нұр-Сұлтан, BAQ.KZ. Карантин режимін біртіндеп жеңілдету дегеніміз өзіміз үйренген күнделікті тіршілікке қайта оралу емес екенін ұғынғанымыз жөн. Бұл туралы Президент өз мәлімдемесінде айтып өтті. 

Ойын-сауық және сауда орталықтары, кинотеатрлар, ресторандар, саябақтар мен адам көп жиналатын басқа да орындар әзірге жабық болады. Жоғары оқу орындары, колледждер, мектептер қашықтан оқытуды жалғастыра береді. Ел тұрғындарын бұл шараларға түсіністікпен қарауға шақырамын, - деді Мемлекет басшысы. 

Президент күннің жылынуы мен карантиннен шаршағандық жауапсыздыққа себеп болмауға тиіс екендігін атап өтті. 

Әсіресе, созылмалы ауруы бар және егде адамдар ерекше сақ болуы керек. Тіпті, кішкентай балалар да ауру жұқтыруы мүмкін екенін байқадық. Сондықтан олардың денсаулығына бей-жай қарауға болмайды. Карантин шараларын қатаң ұстансақ қана індеттен құтыламыз. Аса қажеттілік болмаса, ешқайда шықпай, үйде отырыңыздар, - деп ескертті өз мәлімдемесінде Президент.