Польшалық инвесторлар Шардарада балық шаруашылығын дамытуға ниетті

Түркістан облысында балық шаруашылығын дамыту бағытында инвестиция тарту жұмыстарын күшейтілген. Күні кеше Шардара ауданының әкімі Арман Қарсыбаев Польша елінің «BG Production» балық шаруашылығымен айналысатын компания өкілдерімен кездесті. Олар балық өсіру, балық пен құсқа арналған жем шығару кешені жобасын іске асыруға ниетті, деп хабарлайды BAQ.KZ.

Оның ішінде ақсерке (лосось) балығын өсіруді жоспарлауда.

Компания алдағы 4 айда балық өсіру кешені құрылысының жобалау-сметалық құжаттамасын әзірлеп, жобаны іске асыруға арналған барлық құжаттамаларды рәсімдеуді көздеп отыр.

Аталмыш компания балық өнімдерін еуропадағы ең ірі экспорттаушы кәсіпорындардың бірі саналады.

Аудан әкімі инвесторларға ауданның балық шаруашылығымен айналысуға мүмкіндігі жоғары екендігін айтып, алдағы уақытта бұл бағыттағы жобаларға қолдау білдіретіндігін жеткізді.

Сондай-ақ салаға жауапты мамандар инвесторларға ауданның балық өңдеп, өсіретін кәсіпорындарын аралатып, олардың мүмкіндіктері мен жобаларын таныстырды.