Тоқаев Польшалық Polpharma компаниясының өкілімен кездесті

Нұр-Сұлтан, BAQ.KZ. Қазақстан Республикасының Президенті Қасым-Жомарт Тоқаев Польшалық Polpharma компаниясының бақылау кеңесінің төрағасын қабылдады. Бұл туралы ол өзінің твиттердегі парақшасында жазды.

"Польшалық Polpharma компаниясының бақылау кеңесінің төрағасы Ежи Старак Қазақстанда дәрі-дәрмек шығару жөніндегі бірлескен жобаларды іске асыру туралы ақпарат берді. Бұл компания еліміздегі фармацевтика саласының дамуына айтарлықтай үлес қосуда" - деп жазды ол өз парақшасында.

Қасым-Жомарт Тоқаевқа Қазақстандағы дәрі-дәрмек шығару жөніндегі бірлескен жобалардың іске асырылуы туралы ақпарат берілді. Қазақстан Президенті Polpharma компаниясының фармацевтика саласында ғасырға жуық тәжірибесін атап өтіп, оның Польша нарығындағы көшбасшылардың бірі екенін және еліміздегі осы саланың дамуына ерекше  үлес қосып отырғанын айтты.

"Шетелдік инвесторлар кеңесінің жұмысына қосқан үлесіңіз бен Арыс қаласына гуманитарлық көмек бергеніңіз үшін айрықша ризашылық білдіремін", – деді Мемлекет басшысы.

Ежи Старак Қазақстанда өте жақсы инфрақұрылым қалыптасқанын және оны дамытуға көп күш-жігер жұмсалғанын айтып, компанияның қазақстандық серіктестермен тиімді әрі табысты ынтымақтастығы тың серпін алатынына сенім білдірді.