Полиция күні: Журналистер өзін ұшқыш сезініп көрді

23 маусым Қазақстан полициясы күні. Атаулы мерекеге орай Ішкі істер министрлігі Ұлттық ұлан авиабазасына баспасөз турын ұйымдастырды, деп хабарлайды BAQ.KZ тілшісі.

Астана қаласында Ұлттық ұланның авиация базасының ашылу рәсімі биыл 3 мамырда Президент – ҚР Қарулы Күштерінің Жоғарғы Бас қолбасшысы Қасым-Жомарт Тоқаевтың қатысуымен өткен болатын.

Бүгін Полиция күні қарсаңында елордалық журналистер Ұлттық ұланның 3656 әскери бөлімінде болып, негізгі қызметімен танысты.

Сәуір айында ҰҚК Қарулы Күштерінің, ҚР ІІМ Ұлттық ұланының, Шекара қызметінің бөлімшелері құтқарушылармен және полицейлермен бірге біздің азаматтарымызды көктемгі су тасқынынан құтқаруға белсенді қатысып, елді мекендерде құқықтық тәртіпті қамтамасыз етті. 

Бұрын-соңды болмаған элементтермен күресу үшін әскери авиация да тартылды. 

Олар қатынассыз қалған аудан тұрғындарын эвакуациялап, гуманитарлық жүктерді халыққа жеткізді.

Қазіргі уақытта авиацияда сенімді ұшақтар мен тікұшақтар бар, олар 4000 км-ден астам қашықтыққа тоқтаусыз ұшуға және бір уақытта 20 тоннаға дейін жүк тасымалдауға мүмкіндік береді.

Елордалық БАҚ өкілдері авиациялық техникалар, атап айтқанда ұшу алаңында тұрған Ан-26, Ан-74 ТК-200, Ми-171Е және Ми-8 МТВ-2 секілді әуе кемелерімен танысып, өздерін пилот сезініп көрді.

Борт-техник Арман Пірімбаев әскери базада 2012 жылдан бері жұмыс істейді. 2018 жылдан бастап борт-техник қызметін атқарып келе жатқанын айтты. Ол Ми-171Е ұшағымен қандай тапсырмаларға шыққанын түсіндіріп берді.

Бұл тікұшақ 13 тоннаға дейін салмақ көтере алады. Өзінің салмағы 7,5 тонна. Жоғары жылдамдығы сағатына 250 шақырым. Экипаж 3 адамнан тұрады. Сондай-ақ 27 адамды тасымалдай алады. 4 тоннаға дейін сыртында трос арқылы жүк тасымалдауға мүмкіндігі бар. Бұл тікұшақпен барлау, өрт сөндіру және эвакуациялау жұмыстарын жүргіземіз, - деп айтты ол.

Ұшақтың санитарлық орындары 12 адамға дейін тасымалдай алады.

Сонымен қатар Ми-171Е тікұшағы 2-3 тоннаға дейін су тасу мүмкіндігі бар. Арман Пірімбаевтың айтуынша, осы тікұшақтар көмегімен Батыс Қазақстан, Атырау, Ақтөбе облыстарында және Петропавл қалаларында адамдарды эвакуациялау жұмыстары жүргізілген. Құтқару жұмыстарына 4 ұшақ қатысқан. Ұшқыштар гуманитарлық көмек көрсетіп, адам тасымалдаған.

Журналистер баспасөз туры кезінде авиация базасының асханасында да болып, ас мәзірімен танысып көрді. 

Әскери бөлімде қазақ асханасына бейімделген мәзір. 

Мысалы, қазақша ет, палау, бауырсақ, қаймақ қосылған сүзбе, ірімшік сияқты дәм бар.

Айта кетейік, авиациялық әскери бөлім құрылған сәттен бастап оның ұшқыштары 55 мыңнан астам адам және 7,5 миллион тоннадан астам жүк тасымалдаған. Сондай-ақ бітімгершілік миссия арқалаған қазақстандық жиынтық батальонды тәжік-ауған шекарасына көшіруге қатысты. Сонымен қатар олар Ақтөбе, Ақтау, Талдықорған, Тараз, Қызылорда және Алматы қалаларында арнайы және терроризмге қарсы операцияларға да тартылған.

Биыл ұшқыштар Батыс Қазақстан, Ақтөбе, Атырау, Қарағанды, Қостанай, Ақмола және Солтүстік Қазақстан облыстарында төтенше жағдайлардан зардап шеккендерге көмек көрсетті. Бұл ретте олар 300-ден астам тұрғынды эвакуациялап, 160 тонна гуманитарлық жүк жеткізген.

Авиабазаның Астана әуе айлағында орналасуы жеке құрам мен техниканы қажет жеріне уақытылы жеткізуге мүмкіндік береді. 

Сондай-ақ әуеден барлау жүргізу, зардап шеккендерді эвакуациялау кезінде Ұлттық ұланның бөлімшелеріне авиациялық қолдау көрсетеді.