Полиция грантқа оқуға түсіремін деп сан соқтырған алаяқты қолға түсірді

Астана полицейлері қала тұрғынын колледжге грантқа оқуға түсіремін деп алдаған алаяқты қолға түсірді, деп хабарлайды BAQ.KZ Polisia.kz-ке сілтеме жасап.

Полицияға елорда тұрғыны арызданған. Жәбірленушінің айтуынша, белгісіз әйел педагогикалық колледждердің біріне оқу грантын алып беремін деп уәде беріп, 165 мың теңге сыйақы алған. 

Қалған сомманы кейін бересің деп алдаусыратқан. Ақшаны қолына алған соң байланысты сиретіп, кейін мүлдем хабарсыз кеткен. Кейінірек, уәде етілген грант алаяқтың арбауы екенін түсінген әйел полицияға жүгінді. Алматы АПБ қызметкерлері жедел-іздестіру шаралары барысында 41 жастағы әйелді анықтады. 

Оның бұрын қылмыстық жауапкершілікке тартылғандығы белгілі болды. Ол мойындау көрсетпелерін беріп, ақшаны қажетіне жұмсап үлгергенін айтқан. Осы факт бойынша ҚР ҚК-нің 190-бабы (Алаяқтық) сотқа дейінгі тергеу амалдары жүргізіліп жатыр. Оның өзге де қылмыстарға қатысы бар-жоғы тексеріліп жатыр.