Павлодарлық әуесқой спортшы 220 шақырымдық қайырымдылық марафонын жүгіріп өтті

Павлодар, BAQ.KZ тілшісі. Ертіс өңірінің тұрғыны Нұрсұлтан Бірлік 220 шақырымдық қайырымдылық марафонын жүгіріп өтті. 

Қайырымдылық ультрамарафон үш күнге созылды. Әуесқой спортшы Баянауыл-Майқайың, Майқайың-Қалқаман және Қалқаман-Павлодар бағыты бойынша жүгіріп өтті. Мақсаты - халықты церебралды паралич ауруына шалдыққан Аңсар Дүйсекеевтің еміне қаржы жинауға шақыру. Алты жасар Аңсардың еміне 20 мың АҚШ доллары қажет. Ата-анасының айтуынша, баланың емін шетелдік емханалардың бірінде жалғастыру қажет. Қазіргі уақытта өздігінен жүруге қиналады. 

Аңсардың ата-анасына қомақты қаржы керек. Халық болып бірісек, көмектесуге болады деген ойдамын. Ультрамарафоннан соң азаматтар хабарласа бастады. Әзірге қаражат біртіндеп жиналып жатыр. Балаларымыз ауырмаса деймін. Ал халқымыз, ел-жұрт көмек қолын созады деген сенімдемін. Алдағы уақытта «Қазақстан халқына» қорына өтініщ білдіруді жоспарлап жатырмыз, - дейді Нұрсұлтан Бірлік.

Айта кетейік, бұл - Нұрсұлтан Бірлік бағындырған алғашқы ультрамарафондық қашықтық емес. Бұған дейін Семей-Павлодар бағыты бойынша Олжас Кәкімжановпен бірге 330 шақырымды еңсеріп, отандық рекордты жаңартты. Осылайша, павлодарлық желаяқтардың есімдері Қазақстанның рекордтар кітабына енді. Азаматтың ендігі мақсаты - 500 шақырымды жүгіріп өту. Қазіргі уақытта Нұр-Сұлтан қаласында қызу дайындық үстінде.