Павлодарда 8 мың түп ағаш отырғызылды

Республикалық акция аясында өңірдің 50 мың тұрғыны сенбілікке белсене қатысты. Облыс бойынша барлығы 10 мың тонна қоқыс жиналып, шығарылған.

«Таза Қазақстан» ауқымды жалпыұлттық экоакциясы Павлодарда да өтті. Облыс орталығында жаппай сенбілік өткізіліп, жүздеген түп ағаш отырғызылды. Павлодар қаласының әкімі Хасар Хабылбеков облыс орталығын одан әрі көгалдандыру жоспары басталып кеткенін хабарлады. Биыл Павлодар қаласының аумағында 20 мыңға жуық көшет отырғызылады. Оның тең жартысы «Жасыл белдеуге» егіледі. Сондай-ақ негізгі көшелердегі шіріген ағаштар кезең-кезеңімен ауыстырылады.

Былтыр автоматтандырылған суару кешендері ғашықтар скверінде және орталық скверде орнатылды. Биыл осындай жүйелер орталық жағалауда, Конституция скверінде, Мәшһүр Жүсіп атындағы орталық мешіттің ауласында және Қазқонақ табиғи ескерткіші аумағында пайда болады.

Өңірлік ақпарат және азаматтық даму басқармасының дерегінше, экологиялық акцияға бұл күні 50 мың адам үн қосқан. Тазалық жұмыстарына 1200 техника жұмылдырылып, 10 мың тонна қоқыс шығарылды. Елді мекендерде 8 мың ағаш көшеті мен 5 мың бұта отырғызылған.