Павлодар облысында зорлық-зомбылықтан зардап шеккен оқушы жүкті болып қалған

Павлодар облысында зорлық-зомбылықтан зардап шеккен оқушы қыз жүкті болып қалған, деп хабарлайды BAQ.KZ тілшісі.

Балалардың құқықтарын қорғау комитеті оқиғаға қатысты түсініктеме берді.

21 қараша күні Павлодар облысында зорлық-зомбылықтан зардап шеккен кәмелетке толмаған оқушының жүктілігі туралы ақпарат белгілі болды. Қыздың дене бітімі мен мінез-құлқындағы өзгерістерді бірінші болып мектеп мұғалімдері байқады. Кәмелетке толмаған баланың анасы хабардар етілген, - деп мәлімдеді комитет.

Бүгінгі таңда аталған факті бойынша қылмыстық іс қозғалды. Күдікті - өгей әкесі қамауға алынды.

Зардап шегуші үйде қашықтан оқуда, оған педагог-психолог пен мектеп тарапынан көмек көрсетіледі.

Білім беру ұйымының қызметкерлеріне заңсыз қолданылған тәртіптік жазалар алынып тасталды.

Комитет аталған мәселені бақылауда ұстап отыр.