Пәкістанда нөсер жауын мен қардан 28 адам көз жұмды

Алматы, BAQ.KZ. Пәкістандық ақпарат құралдары соңғы кезде елдің көптеген аудандарында нөсер жауын мен қардың жиілеп кетуінен 28 адамның көз жұмғанын хабарлауда.

Белуджистан провинциясының бас министрі Джам Камал-ханның айтуынша, нөсер жауынның соңы су тасқынына ұласқан, нәтижесінде төрт адам мерт болған. Су тасқыны салдарынан телекоммуникациялық және электр желілері қираған. 

Сондай-ақ Белуджистан провинциясына қарасты бірнеше ауыл су астында қалған, кейбірінде төтенше жағдай режимі енгізіліп, құтқару, іздестіру шараларына төрт тікұшақ жұмылдырылған. 

Мәліметке сүйенсек, жаңбыр мен қардың көптеп жауғанынан тау көшкіні болып, Хайбер-Пахтунхва және Пенджаб провинцияларында кейбір үйлер қираған. Соның салдарынан 24 адам мерт болған. 

Пәкістанның ауа райын болжау қызметі нөсер жауын мен қар 23 ақпанға дейін жалғасатынын хабарлауда.