18 Қараша 2026, 17:48 Фото: uznews.uz

Өзбекстанда сотталғандарға жоғары білім алуға мүмкіндік беріледі

Өзбекстанда сотталғандар жоғары оқу орындарына түсіп, қашықтан оқи алады.

2027-2028 оқу жылынан бастап сотталғандар жоғары оқу орындарына түсіп, ақылы-келісімшарт негізінде онлайн оқи алады. Оқыту есебінен қайталама қылмысты 30%-ға қысқарту жоспарлануда. Өзбекстан президентінің «Жазаны орындау мекемелерінде жазасын өтеп жүрген адамдарды бостандыққа шығаруға дайындау және олардың әлеуметтенуін қамтамасыз ету жөніндегі қосымша шаралар туралы» қаулысы қабылданды.

Қаулыға сәйкес, 2027-2028 оқу жылына дейін жазаны орындау мекемелерінде 310 оқу кабинеті мен практикалық сабақтарға арналған 420 үй-жай ашу жоспарланып отыр.

2030 жылға дейін еңбек нарығында сұранысқа ие кемінде 50 мамандық бойынша білім беру бағдарламалары енгізіледі.

Сондай-ақ алға қойылған мақсаттардың қатарында жыл сайын кемінде 15-20 мың сотталған азаматты сұранысқа ие мамандықтарға оқыту және оларды кәсіптік оқыту есебінен қайталама қылмыс деңгейін 30%-ға төмендету бар.

2027-2028 оқу жылынан бастап «Жаңа өмір» бағдарламасы аясында:

– сотталғандар жоғары оқу орындарына түсіп, ақылы-келісімшарт негізінде қашықтан білім алу мүмкіндігіне ие болады;

– жоғары оқу орындарына түскен сотталғандар үшін колонияларда қашықтан оқытуға арналған бейнеконференц байланыс құралдарымен жабдықталған арнайы бөлмелер бөлінеді.

Бұдан бөлек, жас сотталғандар арасында сайлау арқылы жастар белсенділері анықталып, оларға тоқсан сайын 3 БЕС (базалық есептік шама – 1,32 млн сом) мөлшерінде сыйақы төленеді.

Сонымен қатар барлық колониялардағы сотталғандар арасында «Ёш китобхон» («Жас оқырман») қашықтан байқауы ұйымдастырылып, кітапханаларда «Мутолаа» платформасына қолжетімділік қамтамасыз етіледі.