Отбасыңызда шылым шегетін адам болса, қандай қауіп бар?

ҚР ҰҒА академигі, медицина ғылымдарының докторы, профессор, ҚР бас онкологы Диляра Қайдарова отбасында шылым шегетін адам болса, нені ескеру қажеттігін айтты, деп хабарлайды BAQ.KZ тілшісі.

Айтуынша, өкпе обыры – әлемде ең көп таралған қатерлі ісіктің түрі.

Халықаралық обырды зерттеу агенттігі (IARС) таратқан мәліметке сүйенсек, жыл сайын дүние жүзінде 2 миллионнан астам ерлер мен әйелдер өкпе обырына шалдығады. Олардың үштен екісі – ерлер және үштен бірі – әйелдер.

Ал өкпе обырының негізгі себебі – шылым шегу.

Жыл сайын елімізде өкпе обырына шалдығудың 4 мың жаңа дерегі анықталады. Соның ішінде аурудың 60%-ы – асқынған сатыда анықталады. Ал өлім-жітім құрылымы бойынша өкпе обыры бірінші орында тұр, - деп атап өтті Диляра Қайдарова.

Сонымен қатар дәрігер Қазақстанда өкпе обыры сүт безі обыры мен колоректалді обырдан кейінгі 3-орында тұрғанын алға тартты.

Еліміздің кей өңірінде өкпе обырын ерте диагностикалау үшін бірнеше жыл бұрын пилоттық жобы – төмен дозалы спиралді компьютерлік томографияның көмегімен өкпені сканерлеу іске қосылды. Пилоттық жоба Шығыс Қазақстан, Қостанай және Павлодар облыстарында, сондай-ақ Алматы қаласында іске асырылды. Егер отбасыңызда шылым шегетін адам болса, жыл сайын өкпенің төмен дозалы спиралді компьютерлік томографиясынан өтуге кеңес беремін, - деді бас онколог.