ШҚО-да мыңнан астам отбасы баспаналы болады
Нұр-Сұлтан, BAQ.KZ. Шығыс Қазақстан облысының әкімі Даниал Ахметов қала және аудан әкімдерімен тұрғын үй құрылысы мәселелері бойынша селекторлық кеңес өткізді.
Өңірде көпбалалы және әлеуметтік жағынан аз қамтылған отбасыларға көмек көрсету, атап айтқанда, тұрғын үймен қамтамасыз ету бағытында ауқымды жұмыс атқарылуда. Қазіргі уақытта облыста жеке құрылыс салушылардың қаражаты есебінен жалпы ауданы 37,5 мың шаршы метрді құрайтын екі пәтерлі 209 тұрғын үй салынуда. Бұл үйлер көпбалалы аналарға берілмек.
Айта кетейік, былтыр облысымызда 563 көпбалалы отбасы жаңа үйлерге қоныстанса, осы жылдың соңына дейін тағы 1 047 отбасы баспанамен қамтамасыз етілмек екен. Бүгінге дейін 379 отбасы жаңа үйдің кілтіне ие болып қойған. Жалпы, жыл соңына дейін 668 аз қамтылған және көпбалалы отбасын тұрғын үймен қамтамасыз ету жоспарланған.Бүгінге дейін бұл санаттағы жерлестеріміз үшін жалпы ауданы 12,7 мың шаршы метр болатын 144 пәтерлік 78 тұрғын үйі пайдалануға беріліп қойды, – деп атап өтті облыс әкімі Даниал Ахметов. – Осы ретте, Зайсан ауданында көпбалалы отбасыларға арналған сегіз үй пайдалануға берілгенін айтқым келеді. Тағы сегіз үйдің құрылысы 1-ші желтоқсанға дейін аяқталуы тиіс. Сонымен қатар, келесі жылы 50 үйдің құрылысы жалғасады. Ал Абай ауданында 13 үй салынуда. Бұл жұмыс қараша айының соңына дейін аяқталады деп жоспарлануда.