Өрт сөндіру-құтқару спорты бойынша ел чемпионатында 34 команда бақ сынайды
Таразда өрт сөндіру-құтқару спорты бойынша ҚР чемпионаты басталды, деп хабарлайды BAQ.KZ.
Тараз қаласында өздерінің қызметтік міндеттерін атқару барысында қаза болған өрт сөндіруші-құтқарушыларды еске алу мақсатындағы Қазақстан Республикасының Өрттен құтқару спорты бойынша ХХІХ ерлер арасындағы және ІХ әйелдер арасындағы жазғы чемпионатының ашылуы өтті.
Шара барысында алдымен барлық команда мен олардың жетекшілер, жаттықтырушылары таныстырылып, жиналғандар қызметтік міндеттерін атқару барысында қаза болған өрт сөндіруші-құтқарушыларды бір минут үнсіздікпен еске алды.
Чемпионаттың ашылу салтанатында сөз алған Жамбыл облысының әкімі Нұржан Нұржігітов шараның маңыздылығына тоқталып, барлық қатысушыларға сәттілік тіледі. Ол өзгелер үшін өз басын қатерге тігіп, мамандыққа деген адалдығын танытып жүрген кез-келген өрт сөндірушілер мен құтқарушылар – бейбіт күннің батырлары екенін атап өтті.
Асқан жылдамдық пен жоғары кәсіби шеберлікті талап ететін құтқарушы мамандығының ең басты міндеті – адамдар өмірін құтқару! Олардың әрбір жедел әрі табысты әрекетінің артында сан мыңдаған құтқарылған өмірлер тұрады. Осы орайда, халықтың бейбіт өмірін, тұрмыстағы, өндірістегі қауіпсіздігін қамтамасыз етіп, апаттық жағдайға жол бермеуде аянбай тер төгіп жүрген құтқарушылар мен өрт сөндірушілерге ризашылығымды білдіремін! Қазір Мемлекет басшысы Қасым-Жомарт Тоқаевтың қолдауымен өрт сөндірушілер мен құтқарушылардың материалдық жағдайын жақсартуға барынша көңіл бөлінуде. Жергілікті атқарушы органдар тарапынан да төтенше жағдайлар қызметіне тиісті қолдаулар жалғасатын болады. Сіздер де өздеріңізге артылған жауапкершілік пен міндетті сезіне білесіздер деп сенемін! Бүгінгі чемпионатта өздерінің анттарына адал болып, өзге жандардың өмірін сақтау жолында жанқиярлық танытып, қызмет бабында орны толмас қазаға ұшырап, ерлікпен қаза тапқан өрт сөндіруші-құтқарушыларды құрметпен еске алып, есімін ескеру – борышымыз, - деді аймақ басшысы.
Сондай-ақ «Қазақстандық өрт сөндірушілер және құтқарушылардың спорттық федерациясы» қоғамдық бірлестігінің президенті Дәурен Данаев та өз құттықтауын білдірді.
Айта кетейік, дүбірлі додаға еліміздің әр өңірінен келген барлығы 34 команда, атап айтқанда, ерлер арасында 20 команда, әйелдер арасында 14 команда қатысуда.
Апта соңына дейін созылатын сайыс оқу мұнарасының 2-ші және 4-ші қабатына шабуыл сатысымен көтерілу, кедергілері бар 100 метрлік жолақтан өту, өрт сөндіру эстафетасы, жауынгерлік дайындық секілді өрт сөндіру-құтқару спортының төрт түрі бойынша өтеді.
Чемпионат қорытындысымен ҚР Ұлттық құрама командасын жасақтау үшін үздік спортшыларды анықтау, оларды ұлттық құрама командасының құрамына резервке қосу үшін іріктеулер жүзеге асады. Іріктелген команда ағымдағы жылдың тамыз айында Түркия мемлекетінің Стамбул қаласында өтетін Өрт сөндіру-құтқару спорты бойынша Әлем чемпионатына қатысатын болады.