Оразалин: Қаламен бірге оның инвестициялық маңызы да өсіп келеді
Нұр-Сұлтан, BAQ.KZ. Ақтөбе облысының әкімі Оңдасын Оразалин Әлия Молдағұлова атындағы халықаралық әуежайда болды. Өңір басшысы жөндеуден өткен жаңа техника мен ғимараттарды қарап шығып, қызметкерлермен кездесті.
Әуежайдың қаншалықты маңызды екенін, әсіресе оның тез өсіп, дамып келе жатқан облыс орталығы үшін маңызын түсіндірудің қажеті жоқ. Қаламен бірге оның инвестициялық маңызы да өсіп келеді. Қала көліктік-логистикалық, транзиттік қатынаста жақсы орналасқан. Сондықтан, пандемияға және оның барлық салдарына қарамастан, сіздердегі жұмыс көлемі өсті. Ішкі рейстердің қарқыны артты, көптеген тұрақты шетелдік рейстер пайда болды. Көп нәрсе сіздердің жұмыстарыңыздың үйлесімділігіне байланысты. Өз тарапымыздан материалдық-техникалық жабдықталу жағынан да, қызметкерлер үшін де жағдай жасауды жалғастырамыз, - деді Оңдасын Оразалин.
Қызметкерлер ағымдағы еңбек жағдайлары туралы айтып берді.
Өткен жылы тұрақты және жүк тасымалдары сияқты көптеген жаңа рейстер пайда болды. Бізде "жүк тасымалдары" Түркия, Қазан, Екатеринбург, Сібір, Дубай және басқа бағыттар бойынша ұшады. Тіпті SCAT және Air Astana авиакомпаниялары өздерінің жүк рейстерін ұсынып жатыр, сенесіз бе? Олардың өздерінің тұрақты рейстері бар екенін есептемесек. Жалпы, әкімдікке ауысқанымыздың арқасында көп нәрсе жасалды, жаңартылды. Мұнда ұзақ уақыт жұмыс істегеніммен, бұрын бізде мұндай әдемі терминал болған жоқ. Көп нәрселер жасалғаны үшін сізге және әуежайдың жаңа командалық құрамына рахмет. Біз өте ризамыз. Жалақының өсуімен қызметкерлердің жақсы жұмыс істей бастағаны сезіледі. Бізде 10 жыл бойы жалақы өспеді, - деді ПДСА бастығы Любовь Богданова.
Әуежайды аралау барысында облыс әкімі директорлар кеңесімен бірлесіп "Ақтөбе Халықаралық әуежайы" АҚ басқарма төрағасы Дастан Малиевтің ағымдағы жылдың 8 айындағы өндірістік-шаруашылық қызметінің қорытындылары туралы баяндамасын тыңдады.
Есепті кезеңде қызмет көрсетілген рейстер саны бір жарым есеге - 2968-ге дейін, жолаушылар саны іс жүзінде екі есеге: 485 мыңнан астам адамға өсті. Жүк тасымалдау көлемінің өсуі 94% - ды құрады. Жалпы, әуежайдың кірісі өткен жылға сәйкес кезеңмен салыстырғанда 59%-ға - 1,8 млрд теңгеге дейін ұлғайды.
Ақтөбе әуежайынан Түркістан, Тбилиси, Нүкіс, Ыстамбұл, Қазан қалаларына жаңа тұрақты бағыттар ашылды. Олардың барлығы сұранысқа ие. Бұдан бөлек, Ақтөбеден Санкт-Петербург пен Минскіге тұрақты бағыттар ашу, Мәскеу мен Рас-Эль-Хаймаға рейстерді қайта бастау жоспарлануда.
122 миллион теңге сомасына ұшу-қону жолағына ағымдағы жөндеу, сондай-ақ әкімшілік ғимараттар мен қонақ үйлерге жөндеу жүргізілді.
Жыл басынан бері қызметкерлердің жалақысы 35%-ға өсті. Жалпы, 2019 жылдың ортасынан бастап, әуежай облыс әкімдігінің коммуналдық меншігіне берілген кезде, жалақы 70%-ға өсті.
Сонымен қатар, осы жылдың басынан бастап қызметкерлерге қызметтік нысандар, әкімшілік ғимарат жаңартылып, оларға ыңғайлы болу үшін әуежай аумағына көшірілді. Сондай-ақ осы жылдың қараша айынан бастап қызметкерлерді жұмыс орнына дейін және кері жеткізу көзделетін болады. Ол үшін екі автобус сатып алынады.
Үкімет Қаулысына сәйкес, Ақтөбе халықаралық әуежайы Ақтөбе облысы бойынша жекешелендірудің 2021-2025 жылдарға арналған кешенді жоспарына енгізілгені белгілі. Әуежайды сатып алу құқығымен сенімгерлік басқаруға үш жылға беруді жоспарлады. Алайда бір апта бұрын Ақтөбе әуежайын сенімгерлік басқаруға беру бойынша тендер тоқтатылды.
Тендер шарттарының өзгеруіне байланысты тоқтатылды. Бұл туралы ақпараттық хабарлама 3 қыркүйекте "Юридическая газета" құқықтық газетінде №69-70 номерлерінде жарияланды, - деп нақтылады Ақтөбе облысы қаржы басқармасының басшысы Нұрлыбек Өнербаев.