Оралда 18 жастағы жалдамалы алаяқ ұсталды

Батыс Қазақстан облысы ПД «CyberPol» полиция қызметкерлері жедел-іздестіру іс-шаралары барысында 18 жастағы М. есімді дропперді анықтап, қолға түсірді, деп хабарлайды BAQ.KZ Polisia.kz-ке сілтеме жасап.

Telegram қосымшасы арқылы жұмысқа тұрған ол қызметінің адам алдаумен байланысты екенін біле тұра, алданған адамдардың ақшаларын алаяқтарға жеткізіп отырған. 3 тамыз күні сағат 11:00 кезінде өзін полиция қызметкерімін деп таныстырған белгісіз тұлға жол-көлік оқиғасына кінәлі деп танылған туысын қылмыстық жауапкершілікке тартпау туралы мәселені шешуге көмектесемін деген желеумен түрлі нөмірлерден қоңырау шалып, алдау жолымен 75 жастағы зейнеткердің қаражатын иемденген.
Алаяқтар курьер арқылы ақшаны өздерінің қанжығасына басып отырған.

Айта кететін жайт, алаяқтар алдымен курьердің көмегімен 3 500 еуро мен 3 500 доллар көлеміндегі ақшаны иемденсе, кейін қайта телефон соғып, қосымша 8 млн теңге талап еткен. Екінші жағдайда, «дропперлер» алаяқтарға Орал қаласының 80 жастағы тұрғынына тиесілі 4 мың АҚШ доллары мен 68 мың рубль ақшасын берген. Қылмыс оқиғасы біріншісіне ұқсас. Бұл жағдайда да алаяқтар туыстарын жауапкершілікке тартпау мәселесін шешу үшін ақша талап еткен. Қоңырау шалғандар «шабарман» жіберетінін, ешқайда барудың қажеті жоқ екенін айтқан. Аталған деректерге қатысты ҚР ҚК-нің 190-бабы (Алаяқтық) бойынша сотқа дейінгі тергеу амалдары жүргізіліп жатыр.

Қазіргі уақытта ұсталған азаматтың басқа да осыған ұқсас қылмыстарға бар-жоғы анықталып жатыр. Өкінішке қарай, жүргізілген ақпараттық-профилактикалық жұмыстарға қарамастан, аумақтық полиция бөлімшелеріне алданған азаматтардан арыз әлі түсіп жатыр.