Нью-Йоркте Қазақстан шахматшыларының қатысуымен әлем чемпионаты өтеді

2024 жылғы 26 - 31 желтоқсан аралығында Нью-Йоркте (АҚШ) Қазақстан шахматшыларының қатысуымен рапид пен блиц бойынша 2024 жылғы әлем чемпионаты өтеді, деп хабарлайды BAQ.KZ.

Қатысушылардың старт тізімдерінің басында рапидтен 5 дүркін әлем чемпионы және блицтен 7 дүркін әлем чемпионы, нөмірі бірінші шахматшы, Норвегия ойыншысы Магнус Карлсен пен классикадағы қазіргі әлем чемпионы қытайлық Цзюй Вэньцзюнь бар.

Жалпы, қатысушылардың арасында әр жылдарда рапид пен блицтен әлем чемпионы атанған шоқтығы биік шахмат жұлдыздары көп.

Нью-Йоркке қазақстандық қатысушылардың өкілді делегациясы аттанды. Оның әйелдер жағын блиц бойынша екі дүркін әлем чемпионы (2021, 2022) және рапидтен әлем чемпионатының күміс жүлдегері (2021), халықаралық шебер (IM) Бибісара Асаубаева (2444/2443) бастап барады.

Оның құрамында Будапешттегі 2024 жылғы Шахмат олимпиадасында тамаша ойын көрсетіп жеңіске жеткен ұлттық құрамада – Меруерт Камалиденова (2368/2334), әйелдер арасындағы гроссмейстер (WGM) Алуа Нұрман (2260/2318), әйелдер арасындағы халықаралық шебер (WIM) Әмина Қайырбекова (2256/2144) және WGM Ксения Балабаева (2247/2281) да бар.

Ерлер арасында GM Қазыбек Нөгербек , GM Ринат Жұмабаев , IM Арыстан Исанжолов, GM Рамазан Жалмаханов , IM Арыстанбек Оразаев , GM Әлішер Сүлейменов , IM Эдгар Мамедов және IM Алдияр Аңсат ойнайды.

Өте жас әлем чемпиондары – 12 жасар ФИДЕ шебері (FM) Марк Смирнов (2045/2212) және жақында Қазақстан чемпионатының финалында дебютке шығып тамаша нәтижеге жеткен 10 жасар ФИДЕ шеберлігіне кандидат (WCM) Аланна Берікқызы (1724/1889) KazChess/ҚШФ президенті Тимур Турловтың жеке шақыруын алды.