Нығматулин Бакуде ТүркПа шараларына қатысуда

Нұр-Сұлтан, BAQ.KZ. Мәжіліс төрағасы Нұрлан Нығматулин бастаған парламенттік делегация Бакуде өтіп жатқан Түркітілдес елдер Парламенттік Ассамблеясының шараларына (ТүркПА) қатысуда. Бұл туралы Мәжілістің баспасөз қызметі хабарлады.

Делегация бағдарламасы аясында "Түркі әлеміндегі парламенттік дипломатия: бейбітшілік пен қауіпсіздік мүддесіндегі өңірлік ынтымақтастықты нығайту" тақырыбында пленарлық отырыс өтіп, онда мәжіліс спикері Нұрлан Нығматулин сөз сөйлейді деп жоспарланған.

Экономикалық ынтымақтастық, әлеуметтік, мәдени және гуманитарлық тақырыптармен, қоршаған ортаны қорғау және және табиғи ресурстарды пайдалану,сонымен бірге, халықаралық қатынастар және заңнамалық мәселелермен айналысатын ТүркПА тұрақты комитеттерінің ұсынымдары талқыланатын болады, - делінген хабарламада.

Сондай-ақ, Парламент өкілдері Түркі әлемінің материалдық емес мәдени мұраларын қорғау туралы модельдік заңдар жобасын қарастырып, туризм мәселесіне баса назар аударатын болады.

Қол жеткізілген келісімдер мен шешімдер Баку декларациясында көрсетілетін болады. Мәжіліс төрағасы Нұрлан Нығматулин шетелдік әріптестерімен бірқатар екіжақты кездесулер өткізеді деп күтілуде.