Нұра ауданында он төрт отбасы жаңа пәтерлердің кілттерін алды

Нұр-Сұлтан, BAQ.KZ. Нұра ауданында кезекте тұрған он төрт отбасы көптен күткен баспанаға ие болды. Нұра кентінің жаңа шағын ауданындағы үйлер "Нұрлы жер" мемлекеттік бағдарламасы бойынша салынды.

Қанағат Смағұлова он жыл бойы пәтер алу кезегінде тұрды. Күйеуі қайтыс болғаннан кейін, ол үш баласын жалғыз асырап келеді. Осы жылдар ішінде ол тұрғын үйді жалға алып тұрған.

Осы жылдар ішінде үлкен балаларым өсіп үлгерді. Бірақ мен мемлекеттің көмегінен үміт үзбедім. Өйткені, мен сатушының жалақысына пәтер сатып ала алмаймын. Биыл менің арманым орындалды. Маған үш бөлмелі пәтер берді. Жөндеу жақсы, бөлмелер жарық, маған бәрі ұнайды, - деді Қанағат Смағұлова.

Жаңагүл Малғаждарова бес баланы жалғыз тәрбиелеп отыр. Әйелдің үлкен баласы 14 жаста, ал ең кішісі 2,5 жаста. Әйелдің айтуынша, ол тұрғын үй кезегінде тоғыз жыл тұрған. Отбасы үш бөлмелі пәтер алды.

Жаңа қоныстанушыларға кілттерді Нұра ауданының әкімі Аян Шалмағанбетов табыстады. Ол қоныс иелеріне жаңа үйлерде бақыт пен амандық тіледі.

Жаңа үйлер "Нұрлы жер" мемлекеттік бағдарламасы бойынша салынды. Мердігермен 20 үйдің құрылысына келісімшарт жасалды. Олардың 17-сі тапсырылды, біз оларды кемшіліктер мен ақаулар жойылған кезде кезекте тұрғандар арасында бөлдік. Мердігер тағы үш үйді мамыр айының соңына дейін тапсыруға міндеттелді, - деп атап өтті Нұра ауданының ТКШ бөлімінің басшысы Нұржан Оралбаев.

Бүгінгі күні Нұра ауданында тұрғын үй алу кезегінде 442 адам тұр.