Нұр-Сұлтанда КВИ-мен ауырғандар саны 38% - ға азайды

Нұр-Сұлтан, BAQ.KZ. Қалалық Қоғамдық денсаулық сақтау басқармасы басшысының орынбасары Гүлназ Досмырзаева қалада жұқпалы аурулар стационарларына жатқызылғандар санының азайғанын, сондай-ақ жедел медициналық жәрдем қызметіне жүгінушілер санының азайғанын мәлімдеді, деп хабарлайды Нұр-Сұлтан әкімдігінің ресми сайты.

Бейінді басқарманың мәліметінше, бүгінгі күні қала бойынша КВИ жұқтырған 359 пациент инфекциялық стационарларда ем алуда, оның ішінде 40 адам реанимацияда жатыр.

Инфекциялық стационарларға емдеуге жатқызылған пациенттердің саны өткен айлармен салыстырғанда аз болды. Осылайша, КВИ науқастарының да 38%-ға, сондай-ақ стационарлық емделуде жүргендердің де 27%-ға төмендегені байқалады. Сондай-ақ жедел медициналық жәрдем қызметіне жүгінулер мен шақырулар саны 27%-ға азайды, - деді Гүлназ Досмырзаева.

Бұл ретте МСАК ұйымдары коронавирустық инфекциясы бар пациенттерге үйде қызмет көрсетуді жалғастыруда. Мобильді бригадалар күніне 1000-1200-ге жуық амбулаториялық пациенттердің үйіне барады.

Айта кету керек, аурудың төмендеуінің оң динамикасына қарамастан, елорда тұрғындары мен қонақтары санитарлық нормалар мен карантиндік шектеулер талаптарын қатаң сақтауы керек. Қауіпті вирустан және оның салдарынан қорғаудың ең тиімді әдісі вакцинация болып қала береді.