Нөсер жауын: Алматыда құлаған ағаштарды жинау жалғасуда

Алматы, BAQ.KZ. 14 мамыр күні кешкілік Алматыда соққан дауыл мен нөсер жаңбыр салдарынан құлаған ағаштарды тазартуға ТЖД-нің 109 құтқарушысы жұмылдырылды.

Аталған департаменттің мәліметінше, сәрсенбі күні кешкі сағат 20.00-де Алатау, Алмалы, Әуезов, Бостандық, Жетісу, Медеу, Түрксіб аудандарында тұрғын үйлер мен басқа да су басу қаупі бар ғимараттарда алдын алу жұмыстары басталған.

Құтқару қызметі бөлімшелерінің басты күштері мен құралдары қала көшелерінде желден сынған ағаштарды жинап және Алатау ауданында орналасқан жеке сектордың аулаларынан жаңбыр суын сорып шығарды. Нөсер жаңбыр мен секундына 15 метр жылдамдықпен соққан желдің салдарын жоюды 35 қалалық құтқарушы 11 бірлік техника, 2 мотопомпа көмегімен ТЖД қызметкерлері және аудандық әкімдіктердің қолдауымен жүзеге асырды, - делінген хабарламада.

Естеріңізге салсақ, ауа райының күрт өзгеруінен және өткен сәрсенбі кешкілік мегаполисте жауған нөсердің салдарынан Алматының әр аумағында бір көше мен екі жеке ауланы су басып, 37 ағашқа зақым келді.

Шұғыл қабылданған шаралардың арқасында соңғы бір жарым күнде құтқарушылар жағдайды бақылауға алып, апат салдарын жойды. Апат салдарын жою және қалпына келтіру жұмыстары түнгі уақытта да бір минутқа тоқтаған жоқ және кейбір мекенжайларда ол жұмыстар әлі жалғасуда, - делінген хабарламада.

"Қазгидромет" РМК Алматы филиалының хабарлауынша, 14 мамыр күні Алматыда дауыл болатыны алдын ала жарияланды. Екі күн ішінде мегаполисте 49,5 мм жауын-шашын түскен. Синоптиктердің болжамынша, жаңбырлы ауа райы 20 мамырға дейін жалғасады.