Нигерияда қайық аударылып, 52 адам қаза тапты

Нигерияның Төтенше жағдайлар жөніндегі ұлттық агенттігінің (NEMA) Сокотодағы жедел бөлімінің басшысы Тукур Абубакардың хабарлауынша, таңғы уақыттағы мәлімет бойынша, оқиғадан 52 адам көз жұмған.

Оның айтуынша, қаза болғандардың арасында бір отбасының 11 мүшесі бар.

Оқиға бейсенбі күні Сокото штатының Гороньо ауданындағы Горау қаласында болған.

Бортында шамамен 70 адам болған қайық фермерлер мен жұмысшылар су жолымен күріш алқаптарына бара жатқан кезде аударылған.

Сокото штаты парламентінің депутаты Насиру Адаму бұған дейін 40-тан астам адамның қаза тапқанын, құтқарушылар 16 адамды аман алып қалғанын хабарлаған. Сондай-ақ қайықтағы жолаушылардың басым бөлігі 10 мен 15 жас аралығындағы балалар болғанын айтқан.

Нигерияда қайық апаттары әсіресе жаңбырлы маусымда жиі болады. Бұған қайықтарға шамадан тыс жолаушы мінгізу, олардың техникалық жағдайының нашарлығы және қауіпсіздік талаптарының жеткілікті деңгейде сақталмауы себеп.