Министр инфляция ауыздықталмаса, халық табысы артпайтынын айтты

Бұл туралы Ұлттық экономика министрі Әлібек Қуантыров Халықтың табысын арттыру бағдарламасына қатысты баяндамасында айтты, деп хабарлайды BAQ.KZ тілшісі.

Барлық шараны орындағанымен, егер инфляцияны ауыздықтамасақ, күтілетін нәтижеге жете алмаймыз, - деді министр.

Ол биыл сәуірде жылдық инфляция 2022 жылғы 20,3%-дан 16,8%-ға дейін төмендегенімен, оны 2 есе төмендету міндеті тұрғанын жеткізді. Сондай-ақ республикалық және өңірлік бағдарламаларды орындау қандай нәтиже беруі керегін айтты.

2029 жылға қарай жалпы ішкі өнімдегі еңбекақы үлесі 41,1%-ға жетеді, жалпы табыстардағы еңбек қызметінен түсетін кірістердің үлесі 86,7%-ды, жыл сайын жұмысқа орналастырылатын азаматтардың саны 480 мың адамды, күнкөріс деңгейінен төмен табысы бар халықтың үлесі 5%-ды, жұмыссыздық деңгейі 4,6%, - деді ол.

Бағдарламаның барлық ұсынылған шарасы әрбір өңірде және әрбір азамат үшін әл-ауқат пен өмір сүру сапасын арттыруға, елдің әлеуметтік-экономикалық дамуына жеке секторды тартуды жандандыруға, сондай-ақ мониторингті жақсартуға, мемлекеттік органдардың ашықтығы мен жауапкершілігін арттыруға бағытталған.

Бұл ақпараттар Мәжілістегі AMANAT партиясы фракциясының мүшелері халықтың табысын арттыру бағдарламасын талқылау барысында айтылды.