Мешітте 140 оқушыға мектеп құралдары тапсырылды

Нұр-Сұлтан, BAQ.KZ. Ақтау қалалық Бекет ата мешітінде тұрмысы төмен отбасылардың балаларына мектепке қажетті оқу-құралдары тапсырылды. Мешіт тізіміндегі бұл отбасылардың балғындары оқу жылын су жаңа құралдармен бастамақ. 

Биыл 1-7 сыныптарда оқитын 140 оқушыға көмек көрсетіп отырмыз. Оқушыларға қажетті сөмке, дәптер, қаламсап, түрлі-түсті бояулар алынып, сақтық шараларын сақтай отырып таратылды. Негізінен аз қамтылған және көпбалалы отбасылардың балалары таңдап алынды. Басты мақсат – әлеуметтік аз қамтылған отбасыларға жанашыр болып, білімге құштар өрендерге жақсы көңіл-күй сыйлау, – дейді Ақтау қалалық Бекет ата мешітінің бас имамы Қайрат Маманбаев. 

Айта кетейік, Ақтау мешіті тізімінде 500-ден астам тұрмысы төмен отбасы тіркелген.