Мемлекеттік қызмет көрсетудің екі түріне өзгерістер енгізілді

Нұр-Сұлтан, BAQ.KZ. 2019 жылдың сәуірінде ҚР бас прокурорының бұйрығымен әкімшілік құқық бұзушылықтар туралы мәліметтер мен мұрағаттық анықтамаларды беру бойынша Мемлекеттік көрсетілетін қызметтер стандартына өзгерістер енгізілді.

ҚР БП Құқықтық статистика және арнайы есепке алу жөніндегі комитетінің хабарлауынша, енді мұрағаттық анықтамаларды алу үшін азаматтардың қызмет көрсетушіге – құқықтық статистика органына жүгінуі қажет емес, тек «Азаматтарға арналған үкімет» Мемлекеттік корпорациясына немесе «электрондық үкіметтің» веб-порталы арқылы өтініш берсе жеткілікті. 

«Бұл ретте, осы қызметті көрсету мерзімі 30 күнтізбелік күннен 10 күнге қысқарды. Сондай-ақ, әкімшілік құқық бұзушылықтар туралы мәліметтерді беру процесі жеңілдетілді. Мемлекеттік көрсетілетін қызмет тек «электрондық үкімет» веб-порталы арқылы жүзеге асырылады. Мәліметтерді қызмет көрсетуші және «Азаматтарға арналған үкімет» Мемлекеттік корпорациясы арқылы алудың баламасы жойылған», - делінген таратылған ақпаратта. 

Ол үшін азамат порталда ЖСН-ның көмегімен тіркеуден өтіп, сондай-ақ «қызметке онлайн тапсырыс беру» функциясын көрсету қажет. Анықтаманы алу мерзімі 3 жұмыс күнінен 15 минутқа дейін қысқарды.