Мектептер, аулалар, әлеуметтік баспана: Астана қалай дамып жатыр
Астана қаласының әкімі Жеңіс Қасымбек Instagram парақшасында биыл ашылатын әлеуметтік нысандар туралы мәлім етті, деп хабарлайды BAQ.KZ елорда әкімдігінің ресми сайтына сілтеме жасап.
Оңтүстік-Шығыс шағын ауданының (Алматы ауданы) тұрғындарымен кездестім. Бұл шағын ауданда 80 мыңнан астам адам тұрады. Тұрғындар инженерлік желілер, жолдар, әлеуметтік нысандар салу, абаттандыру, автобус санын арттыру, интернет секілді өзге де мәселелерді көтерді.Бұл шағын аудандағы басты міндет – инженерлік желілер мен жолдар салу, абаттандыру. Біз ең бірінші кезекте осы жұмыстарды орындаймыз. Сондай-ақ Оңтүстік-Шығыста мектеп салынады, - деп жазады Жеңіс Қасымбек.
Сондай-ақ ол, балалардың бос уақытын тиімді өткізуі үшін арнайы орындар ашу маңызды екенін ескере отырып, аулалар мен қоғамдық кеңістіктер, сол сияқты дене шынықтыру-сауықтыру кешендерін салынатынын айтып өтті.
Балаларды көбірек қамту үшін үш жыл ішінде 15 Оқушылар сарайын салуды жоспарлап отырмыз. Олардың бесеуінің құрылысы күзде басталады. Олардың бірі Оңтүстік-Шығыс шағын ауданында орналасады.Биыл жалпы қала бойынша 6 мыңға жуық әлеуметтік пәтер, 11 мектеп, 150-ден астам аула мен қоғамдық кеңістік салуды, 400-ге жуық автобус және т.б. іске қосуды жоспарлап отырмыз.
Көтерілген мәселелерді шешу жұмысы қолға алынды. Шағын аудандар мен елді мекендерді жұмыс кестесіне сәйкес дамытатын боламыз», - деп жазады Жеңіс Қасымбек.