Маңғыстауда тамақтан уланған балалардың жағдайы белгілі болды

Маңғыстау облысында тамақтан уланған балалардың жағдайы тұрақты қалыпты, деп хабарлайды BAQ.KZ тілшісі.

Маңғыстау облысы Білім басқармасының басшысы Динара Жұмашева Маңғыстау-5 амбулаториялық пунктінде және Мұнайлы аудандық емханасында ем алып жатқан оқушыларға барып, балалардың жағдайларын біліп, ата-аналарымен кездесті.

Басқарма басшысы білім саласының қызметкерлері ата-аналар мен оқушыларға әрқашан көмектесуге дайын екенін жеткізді.

Бесшоқы ауылының №8 мектебінде болған жағдайға байланысты қандай емдеу шаралары жүргізіліп жатқаны белгілі болды.

Бесшоқы бастапқы медициналық-санитарлық көмек көрсету орталығында, сонымен қатар орталық емханада ауызбен суландыру бөлімдері ашылды. Бақылаудағы балалардың жағдайы тұрақты қалыпты. Үйдегі ата-аналарға қайталап ауырып, қызуы көтеріліп, іші өтіп жатқан балаларды үйде өз беттеріңізбен емдемей, дәрігердің көмегіне жүгініңіздер. Ауызбен суландыру бөлімшелеріне келіп, балаларыңызды қаратып, дәрігердің нұсқауымен ем қабылдағандарыңыз жөн, - деді Динара Жұмашева.

Бұған дейін, Бесшоқы ауылының №8 мектебінде бірінші ауысымның 1-4 сынып оқушылары асханада жаппай уланған. 

Қазіргі уақытта іш ауруы, дене температурасының жоғарылауы туралы шағымдары бар 67 бала көмекке жүгінді. 

Ал әлеуметтік желіде уланған балалардың саны 92-ге жетті деген ақпарат тарады. Бесшоқы ауылының тұрғыны уланған оқушыларды ауруханаға жатқызу үшін жедел жәрдем вагондарының тапшылығы туралы бейне түсірген. Оның сөзінше, арнайы көлік тек бір науқасты тасымалдаған.