Мамин Қарағанды облысында "Нұрлы жол" мен "Нұрлы жердің" іске асырылу барысын тексерді

Нұр-Сұлтан, BAQ.KZ. Асқар Мамин Қарағанды облысында "Нұрлы жол" және "Нұрлы жер" мемлекеттік бағдарламаларының іске асырылу барысын тексерді. Бұл туралы премьер-министрдің баспасөз қызметі хабарлады.

Үкімет басшысы жалпы ұзындығы 363 шақырым болатын "Қарағанды – Балқаш" автожолының реконструкциясымен танысты. Жөндеу жұмыстарына 1800 жұмысшы мен 900-ге жуық техника тартылған.

Биыл барлық жол бойындағы жаңа жабыны бойынша жол қозғалысын ашуды қамтамасыз ету, сондай-ақ 297 су өткізетін құбыр, 17 көпір, жол айрығында екі жолөткел және ауыл шаруашылығы техникасының өтуі үшін 33 жолөткел салу жоспарланған.  

Биыл "Нұрлы жол" мемлекеттік бағдарламасы аясында Қарағанды облысында  жол құрылысы жұмыстарымен барлығы 800 шақырымнан астам жол қамтылатын болады.  

Премьер-министр жол құрылысы жұмыстарының қарқынын күшейтуді тапсырды және құрылатын жол инфрақұрылымының сапасын қамтамасыз етудің маңыздылығын атап өтті.  

Балқаш қаласында А. Мамин "Нұрлы жер" бағдарламасы аясындағы әлеуметтік тұрғын үйдің салыну барысымен, сондай-ақ әуежайды реконструкциялау және өңірдің туристік әлеуетін арттыру жобасымен танысты.  

Сонымен қатар Үкімет басшысы "Kazakhmys Smelting" ЖШС Балқаш мыс балқыту зауытына барды, онда өндіріс процесімен және кәсіпорынды одан әрі дамыту жоспарымен таныстырылды.