Мал басына бирка сатып алу қызметі әкімдіктерге беріледі - АШМ

Ауыл шаруашылығы вице-министрі Рүстем Құрманов  Президент жанындағы ОКҚ-да өткен брифингте айтты, деп хабарлайды BAQ.KZ тілшісі. 

Жануарларды сәйкестендіру және жоспарлы вакциналау жұмыстарын тиімді жүргізу үшін мал басына бирка сатып алу қызметі әкімдіктерге беріледі. Бұл ретте жеке қосалқы шаруашылықтарға тиесілі жануарлар үшін жапсырмалар тегін беріледі, өйткені сатып алу бюджет есебінен жүзеге асырылады. Жануарларды бірдейлендіруді және ветеринариялық-профилактикалық іс-шараларды уақтылы жүргізу үшін жануарлардың ақпараттық жүйесінің мобильді нұсқасы іске қосылады, - деді Құрманов.

Оның айтуынша, ауыл шаруашылығы жануарларын уақтылы егу үшін заңнамалық деңгейде препараттарды сатып алу функцияларын орталықтандыру мәселесі пысықталады. 

Бірыңғай оператор отандық өндірушілермен ұзақ мерзімді келісімшарттар жасай алады, бұл өз уақытында өзекті штаммдары бар вакциналардың қажетті көлемде болуына мүмкіндік береді, өйткені әлемдегі эпизоотиялық жағдай үнемі өзгеріп отырады. Ветеринария саласындағы цифрландыру аясында «ауыл шаруашылығы жануарларын бірдейлендіру» мобильді қосымшасы әзірленеді, ол жануардың биркасын сканерлеу арқылы барлық қажетті деректерді ақпараттық жүйеге енгізуге мүмкіндік береді. Мобильді қосымша да офлайн режимде жұмыс істейді, - деді ол. 

Ветеринария процестерін цифрландыруды және автоматтандыруды жүргізу статистикалық деректердің дұрыстығын қамтамасыз етеді.

Сондай-ақ ветеринариялық дәрігерлерді қағаздағы жұмыстан босатады, экспортқа/импортқа рұқсат беру құжаттарын алуды жеңілдетеді, бақылаудағы объектілердің орнын ауыстыру мен айналымын бақылауды күшейтеді, субсидиялар мен жеңілдікті кредиттер алу кезінде сыбайлас жемқорлық пен алаяқтық тәуекелдерді төмендетеді, - деді ол.