Лос-Анджелестегі өрт. Кімдердің үйі күлге айналды?
Лос-Анджелесте алапат өрт ең қымбат зәулім сарайларды күлге айналдырды. Пасифик-Палисейдс ауданындағы үйдің орташа құны 3 миллион доллар. Сарапшылардың болжауынша, аймақтағы үй шығындары 8 миллиард доллардан асады, деп хабарлайды BAQ.KZ тілшісі.
Калифорнияның төтенше жағдай қызметі осы аптада Лос-Анджелесте жел күшеюі мүмкін екенін мәлімдеді. Бұл фактор бір аптаға созылып келе жатқан өрттің күшеюіне алып келуі мүмкін. Қазіргі таңда ең ауқымды өрт Пасифик-Палисейдс ауданында болып жатыр. Тілсіз жау штат маңындағы Брентвуд пен Бель-Эйр аудандарына қауіп төндіріп тұр. Аталған аймақтарда көптеген америкалық жұлдыздардың үйлері орналасқан.
Еске салайық, Лос-Анджелесті 7 қаңтардан бастап өрт шарпыды. Билік мұны ел тарихындағы ең ауқымды апаттың бірі деп таныды. Лос-Анджелес округінің патологоанатомы аймақта 24 адамның қаза болғанын айтады. Шамамен 180 мың адам эвакуацияланып, 10 мыңға жуық ғимарат қирап қалған.
Қандай жұлдыздардың үйі жанып кетті?
Ең үлкен аумақты алған өрт Пасифик-Палисейдс ауданында болды. Онда тілсіз жау 60 шаршы шақырымнан астам аумақты шарпып кеткен. Малибу мен Санта-Моника қалаларының арасындағы бұл аймақта Голливуд жұлдыздары тұрады. Олардың көбі үйлерінен айырылып, аймақтан кетуге мәжбүр болды.
Малибу қаласында Пэрис Хилтонның зәулім үйі жанып кетті. Әнші бұл туралы Instagram-да жазба қалдырып, өкінішін айтты.
Жүрегім жаралы, бір сөзбен айтып жеткізу мүмкін емес. Отбасыммен бірге отырып, жаңалықтардан Малибу қаласындағы үйіміздің тікелей эфирде күлге айналғанын көру — ешкімнің басына келмесе екен дейтін жағдай. Бұл үйде қаншама қымбат естеліктер бар еді, — деп жазды Хилтон.
ХХ ғасырдың орта шенінде салынған үйді ол 2021 жылы 8,4 миллион доллардан астам ақшаға сатып алған. Үйде үш жатын бөлме, үш жуынатын бөлме, колонналары мен үлкен шамдары бар камин залы, сондай-ақ мұхит көрінетін балкон болған. Үй Пэристің сүйікті Барби стилінде жасалған еді.
Бен Аффлекің 20 миллион доллары
Актер Бен Аффлек небәрі бес ай бұрын Дженнифер Лопеспен ажырасқаннан кейін сатып алған Пасифик-Палисейдстегі зәулім үйі де толығымен отқа оранды. Кең үйде жеті жатын бөлме, тоғыз жуынатын бөлме, жаттығу залы, SPA-салоны және жеке кинотеатры болған.
Сонымен қатар 87 жастағы Голливуд жұлдызы Энтони Хопкинс 2021 жылы Пасифик-Палисейдс ауданынан 6 миллион долларға жылжымайтын мүлік сатып алған еді. Қазір ол үйдің тек күлі қалған.
Актер Билли Кристал мен оның жұбайы Дженис Пасифик-Палисейдс ауданындағы 46 жыл бойы тұрған үйлерінен айырылды.
Біз Дженис екеуміз бұл үйде 1979 жылдан бері тұрдық. Бұл жерде балаларымыз бен немерелерімізді өсірдік. Үйдің әрбір бұрышында махаббат пен естеліктер сақталған. Әрине, жүрегіміз жаралы, бірақ балаларымыз бен достарымыздың қолдауымен бұл қиындықты еңсереміз, — деп жазды Кристал отбасы.
Мария Шрайвер (Арнольд Шварценеггердің бұрынғы әйелі) құны 10 миллион доллар тұратын үйі жанды
Калифорнияның бұрынғы губернаторының әйелі бүкіл көшенің күлге айналған қалдықтарын көрсеткен бейне жариялады. Оның үйі бірінші жанып кеткендердің қатарында болды. Бұл зәулім үйді Шрайвер Шварценеггермен ажырасқаннан кейін 10 миллион долларға сатып алған болатын.
Ең қымбат сарайдың бірі Мэл Гибсонға тиесілі еді. Оның құны – 14,5 миллион доллар
Актер Мэл Гибсон зәулім сарайын 2008 жылы актер Дэвид Духовныдан сатып алған. Үй ортағасырлық стильде салынған.
«Однажды в Америке» фильмінде ойнаған актер Джеймс Вудс CNN арнасына берген сұхбатында үйінен айырылғанын айтып, көз жасын тыя алмады.
Кеше ғана бассейннің жанында демалып едің, бүгін айналаң тозаққа айналғандай, хаос басты. Мұндай жағдайға мықты боламын деп ойлап едім…, — деді ол.
Пасифик-Палисейдс ауданында жылжымайтын мүлігі бар танымал тұлғалар арасында режиссер Стивен Спилберг, актерлер Том Хэнкс, Адам Сэндлер, Дженнифер Энистон, Брэдли Купер және басқалары бар.
Орман өрттеріне байланысты көптеген жұлдыздар эвакуациялануға мәжбүр болды.
Калифорнияның қауіпті аудандарынан эвакуацияланғандардың қатарында «Оскар» сыйлығының иегері Бен Аффлектен бөлек («Умница Уилл Хантинг», «Операция «Арго»), актер Марк Хэмилл («Жұлдызды соғыстардағы» Люк Скайуокер) және Голливудтың «Даңқ аллеясында» жұлдыз иесі атанған әнші Мэнди Мур бар.
Шынымды айтсам, қатты күйзеліп, есеңгіреп отырмын. Менің балаларымның мектебі де өртеніп кетті. Сүйікті мейрамханаларымыз бен достарымыздың үйлері де күлге айналды, — деп жазды Мэнди Мур Instagram-да.