Күннің күрт суытуы АҚШ-тың бірнеше штатында вакцинация қарқынын бәсеңдетті

Нұр-Сұлтан, BAQ.KZ. АҚШ-тың ондаған штатын қамтыған бұрын-соңды болмаған қолайсыз ауа райына байланысты елде вакцина жеткізу кешіктіріліп, бірқатар вакцинация  орталығы жабылды, деп хабарлайды америкалық БАҚ.

Ауруларды бақылау және алдын алу орталықтары (CDC) алдағы бірнеше күнде COVID-19 вакцинасын жеткізу жаппай кідіруі мүмкін екенін мәлімдеді, өйткені, АҚШ-тағы қолайсыз ауа райы сейсенбіде Техастан Индианаға дейін вакцинация орталықтарын жабуға мәжбүр етті.

Техас штатының Харрис округінде Денсаулық сақтау қызметкерлері мыңдаған дозалы вакцинаны бірнеше аудандық ауруханаға жеткізуге асыққан, өйткені олар сақталған Денсаулық сақтау департаментінің ғимараты электр қуатынсыз қалды, ал резервтік генераторлар істен шыққан, тиісінше, олар вакциналарды қажетті жағдайда сақтауға қауқарсыз. Ауруханалар, Райс университеті және аудандық түрме арасында 5,4 мыңнан астам доза бөлінді.

Алабама, Иллинойс, Кентукки, Миссисипи, Оклахома, Теннесси және Миссуридегі бірнеше аудандық егу орталықтары ауа райына байланысты жабылды.

Миссури штатының губернаторы Майк Парсонс осы аптаға жоспарланған жаппай вакцинация шаралары да тоқтатылатынын айтты.

Техас шенеуніктері қазір алынуы керек 400 мыңнан астам қосымша доза, аязға байланысты сәрсенбіге дейін келмейтінін мәлімдеді.

АҚШ-тың миллиондаған тұрғыны электр қуатынсыз қалды. Техас штатында 3,1 миллионнан астам үй мен кәсіпорын қуатсыз, 4 миллионға жуық адам электр жарығынсыз қалды, деп хабарлайды poweroutage.us.

Айта кету керек, сейсенбіде 2,7 мыңнан астам рейс және сәрсенбіге жоспарланған 1,7 мыңға жуық рейс тоқтатылды.