Күніне 2 мың теңге: Депутат спортшы мен сарбаздың тамағына бөлінетін ақшаны салыстырды

Мәжіліс депутаты Константин Авершин елімізде әскери қызметшілер сапалы тамақтанбайтынын және олардың азық-түлігіне бөлінген ақша спортшылардікінен әлдеқайда аз екенін айтып, Үкіметке сауал жолдады, деп хабарлайды BAQ.KZ тілшісі.

Қарулы Күштер мен басқа да әскери құрамаларды азық-түлікпен қамтамасыз ету мәселесі бір елдің қорғаныс қабілетін қамтамасыз етудің негізгі факторларының бірі. Бұл функция шығындарды оңтайландырып, тағам сапасын жақсарту үшін 1998 жылдан бері аутсорсингке берілген. Алайда, соңғы жылдары қоғамдық тамақтандыру қызметтерінің құны нарықтың нақты жағдайына сәйкес болуды тоқтатты. Ұлттық статистика бюросының мәліметі бойынша, биыл мамыр айында азық-түлік рационының орташа құны 3000 теңге болды, бұл бекітілген 2250 теңгеден 33 пайызға жоғары, - деді депутат.

Авершиннің айтуынша, үстеме шығындарға (салықтар, әлеуметтік аударымдар және шығыстар) байланысты шығындарды талдау олардың 2250 теңге рацион құнынан 647,80 теңгені құрайтынын көрсетті.

Бұдан бір әскери қызметшіге нақты бөлінген сома бүгінде 2250 теңге емес, 1602,20 теңге (2250 – 647,80 = 1602,20) деген қорытынды жасауға болады. Инфляция мен бағаның өсуі аясында 2022 жылы белгіленген қаржыландыру нормалары бұдан былай барлық қажетті шығынды өтемейді, бұл әскери қызметшілерді тамақтандыру сапасына тікелей әсер етеді, - деп түсіндірді Мәжіліс депутаты.

Ол Спорт министрлігінің спортшыларға 2024 жылға бекіткен азық-түлік ақысын салыстырып көрсетті.

1) 1-тармақ – 3 АЕК-ке дейін немесе тәулігіне 11 076 теңге (бокс, еркін күрес, қоян-қолтық ұрыс, аралас жекпе-жек және т.б.);

2) 2-тармақ – тәулігіне 2,3 АЕК-ке дейін немесе 8491,6 теңге (бочка, оқ ату, спорттық туризм, саз көгершін ату, қозғалатын нысанаға ату, черлидинг және т.б.);

3) 3-тармақ – 1,7 АЕК-ке дейін немесе тәулігіне 6276,4 теңге (спорттық балық аулау, кеме модельдеу, тоғызқұмалақ, шахмат, дойбы және т.б.).

Бұл ретте бір сарбазға берілетін азық-түлік құны күніне 2 250 теңге. Қолданыстағы әдістер бойынша күрескер дойбы ойыншысынан үш есе нашар тамақтануы керек.

Спортшыларға жұмсалған шығындармен салыстыру айтарлықтай диспропорцияны көрсетеді. Бұл қолданыстағы стандарттарды қайта қарау және басқа салаларды стандарттарға сәйкес келтіру қажеттілігін көрсетіп, әлеуметтік әділеттілік қағидаттарын бұзылғанын білдіреді. Қазіргі жағдай әскери қызметкерлерді тамақтандыру сапасының нашарлауымен ғана емес, сонымен қатар армияның азық-түлікпен толық қамтамасыз етілмей қалу қаупін тудырады, өйткені жеткізушілер шығынмен жұмыс істей алмайды, - деді Константин Авершин.

Мәжіліс депутаты Үкімет басшысына жауапты министрлікке бағалар мен үстеме шығыстарды ескере отырып, азық-түлiк рационының құнын қайта қарау жөнiндегi жұмысты аяқтауды қайтадан тапсыруды сұрады.