Коронавирус: Цой Қазақстанның қай аймақта орналасқанын айтты

Нұр-Сұлтан, BAQ.KZ тілшісі. Үкіметтің отырысында Денсаулық сақтау министрі Алексей Цой елдегі эпидемиологиялық ахуал туралы баяндады.

Әлемде 171 011 960 КВИ жағдайы тіркелді. Күніне шамамен 392 093 жағдай тіркеліп отыр. Коронавирус инфекциясынан 3 547 894 адам қайтыс болды. Өлім көрсеткішісі 2,1%-ды құрап отыр.

Әлем рейтингінде ауру жұқтыру көрсеткіші бойынша Қазақстан 221 елдің ішінде 104-орында тұр. Ал соңғы төрт аптада өлім көрсеткіші бойынша Қазақстанның позициясы 5 бірлікке төмен түсті. Атап айтқанда, 107-ден 112 орынға түсті, - деді министр.

Цой атап өткендей, Қазақстанда 1 маусымдағы жағдай бойынша КВИ-ге ПТР тест сынамасы оң 387 672 жағдай тіркелсе, ал КВИ-ге ПТР тест сынамасы теріс 55 263 жағдай анықталды.

Қазақстан Республикасы «сары аймақта» орналасқан. «Қызыл аймақта» Нұр-Сұлтан қаласы, Ақмола облысы және Қарағанды облыстары, «сары аймақта» 6 өңір – Алматы қаласы, ШҚО, СҚО Атырау, Павлодар, Қостанай облыстары бар. Қалған 8 өңір «жасыл аймақта» орналасқан, - деп түсіндірді Денмин басшысы.

Жалпы республика бойынша коронавирус инфекциясын жұқтыру төмендеп келеді.

Оның сөзінше, соңғы аптада КВИ анықталған жағдайлардың саны 15 мыңнан 12 мыңға дейін немесе өткен аптамен салыстырғанда 21%-ға төмендеді.

Жалпы, соңғы айда ауру 1,6 есе азайды.