Комаға түскен сарбаздың жағдайы қалай? - Қорғаныс министрлігі жауап берді

Қорғаныс министрлігінің ресми өкілі Руслан Жанғұлин Жамбыл облысы Отар кентіндегі әскери бөлімде комаға түскен мерзімді қызметтегі сарбаздың жағдайы қалай екенін айтты, деп хабарлайды BAQ.KZ тілшісі.

Қазір сарбаз Алматы қаласындағы әскери-клиникалық госпитальде жатыр. Оған барлық қажетті медициналық көмек көрсетілуде. Әскери дәрігерлер мен басқа да мамандар оны күнде тексеріп, барлық қажетті ем-дом шараларын жүргізіп жатыр. Бүгінде оның жағдайы тұрақты-ауыр деп бағаланады. Бірақ жақсарып келеді, - деді Жангұлин ОКҚ-дағы брифингте.

Ол осы факті бойынша қызметтік өкілеттігін асыра пайдаланған әскери қызметшіге қатысты әскери-тергеу органдары тергеу басталғанын айтып, басқа да мәліметтер жария етуге жатпайтынын түсіндірді.

Жамбыл облысы Отар ауылындағы №30212 әскери бөлімінде әскери борышыны өтеп жүрген 19 жастағы сарбаз Нұржігіт Әбділпат жансақтау бөліміне түскен. Анасының сөзінше, ұлы әлімжеттік құрбаны болған.

Еске сала кетейік, Мемлекет басшысы Қасым-Жомарт Тоқаев Жамбыл облысының Отар ауылында ес-түссіз күйге түскен әскер қатарына шақырылған сарбазға қатысты жағдайды жан-жақты тексеруді талап еткен болатын.