Қазақстан 12 күннен бері «қызыл» аймақта

Нұр-Сұлтан, BAQ.KZ тілшісі. Бұл туралы бүгін Үкімет отырысы барысында Денсаулық сақтау министрі Алексей Цой айтты.

Ел өңірлеріндегі эпидемиологиялық жағдайды бағалау матрицасына сәйкес, республика 12 күннен бері «қызыл» аймақта тұр. Жалпы, «қызыл» аймақта 8 яғни, Нұр-Сұлтан, Алматы қалалары және Қарағанды, Атырау, Ақмола, Ақтөбе, Алматы, Батыс Қазақстан облыстары бар. Өткен апта ішінде «сары» аймаққа 4 өңір енді, осылайша онда барлығы Солтүстік Қазақстан, Жамбыл, Маңғыстау, Қызылорда, Қостанай, Павлодар облыстары және Шымкент қаласы тұр. «Жасыл» аймақта тек Түркістан және Шығыс Қазақстан облыстары қалған, - деді ол.

Министрдің айтуынша, сәуірде елдегі эпидемиологиялық жағдай төмендеген. Сәуірдің 11 күнінде бас-аяғы 24 955 адам вирус жұқтырған. Сырқаттанушылық деңгейі 3 есеге өскен. Тәулігіне 2800-ге дейін жағдай тіркелуде.

Сырқаттанушылық деңгейі Қазақстанның Түркістан және Қостанай облыстарынан басқа барлық өңірінде байқалып отыр. Осы ретте сырқаттанушылық көрсеткішінің 61%-ы үш өңірге - Нұр-Сұлтан, Алматы қалалары және Алматы облысына тиесілі. Сырқаттанушылық деңгейінің артуына байланысты өлім-жітім көрсеткіші де өсіп отыр. Елімізде ақпан айымен салыстырғанда наурыз айында қайтыс болғандар саны 1,4 есеге артты. Бұл орайда қайтыс болғандардың 57%-ы үш өңірге - Нұр-Сұлтан, Алматы қалалары және Алматы облысына тиесілі, - деді ол.

Цой эпидемиологиялық жағдайдың күрделенуіне орай тестілеу көрсеткіші тәулігіне 48 000-ға дейін өскенін айтты. Ол сонымен қатар, өңір әкімдерінен жағдайды үнемі бақылауда ұстап, мониторинг жүргізуді, жылдам әрекет етіп, профилактикалық шараларды іске асыруды сұрады.