"Қарлығаш ұя салғанда" – екінші маусым
Нұр-Сұлтан, BAQ.KZ. «Хабар» телеарнасынан бүгіннен бастап, өткен жылы көрерменнің көзайымына айналған «Қарлығаш ұя салғанда» телехикаясының екінші маусымы жалғасын табады.
Телехикаяда отау тігіп, отбасын құруға бел буған Тасқын мен Қарлығаш бүгінгі қоғамның бет-бейнесін баз қалпында көз алдыңызға алып келеді. Себебі, бүгінде, сезім сырын сезініп, махаббатпен бас қосқан көптеген жас ерлі-зайыптылар – өмір өткеліндегі түрлі тартысқа тойтарыс бере алмай, сергелдеңге салынып жатқаны жасырын емес. Дәл осы сынды бүгінгі қоғамның өзекті мәселелері - аталмыш мелодрамаға арқау болады.
Отбасылық өмірге екінші рет қадам басар алдында Тасқын - өткен өміріне оралып, бақилық болған жарының ата-анасының алдынан өтеді. Көп ұзамай екі жастың үйлену тойлары да өтеді. Сол сәтте Тасқын да, Қарлығаш та, Тасқынның қыздары да бақытты еді. Бірақ, бұл бақытты сәт – әрі қарай ұзағынан жалғасын таппайды. Балқып-шалқыған тұрмыстық жағдайда өмір сүруге әбден дағдыланған Қарлығаш – Тасқынның қарапайым үйіне келіп, таршылықтың тонын кигендей күй кешеді. Тіпті жас жұбайлар күнделікті күйбің тіршілікте бір-бірімен келісе алмай қалатын келеңсіздіктерге жиі тап бола бастайды. Үйлену - оңай, үй болу - қиынның кебін киген Тасқынның да, Қарлығаштың да жұмыстарында да қиындықтар басталады. Тас пен тауға бас ұрардай бұл кезеңді бас кейіпкерлер бірге өткере алады ма? Жұмысы десе қашан да жанын беретін Қарлығаш - өмірінде өткені бар Тасқынмен құрған шаңырағын шайқалтуы мүмкін бе? Өзі таңдаған тағдырына мойынсұнған Тасқын таңдауына қарсы тұра алады ма?
Сан түрлі сезімге бөлейтін «Қарлығаш ұя салғанда 2» телехикаясын бүгіннен бастап «Хабар» телеарнасынан 21.40-та тамашалаңыздар.
Романтикалық драмада басты рөлдерді - Кәмшат Жолдыбаева, Еркебұлан Дайыров, Мерей Мақажан, Алау Қайратқызы, Аружан Қамбар, Тынышкүл Сұлтанбердиева, Жоламан Әміров, Әдина Бажан, Асқар Жұмабек және т.б.актерлар сомдайды.