Каратэ-до WKF: Астанада жастар арасында ел чемпионаты өтті

Елордада каратэ-до WKF-тен юниорлар мен жастар арасында Қазақстан Республикасының чемпионаты өтті, деп хабарлайды BAQ.KZ.

Жарысқа еліміздің әр өңірінен 20-ға жуық командадан 421 спортшы қатысып, бақ сынады.

Каратэ елімізде ғана емес әлемде өте жақсы даму үстінде. Оған дәлел 2022 жылы өткен әлем чемпионатында Қазақстан командасы 129 мемлекеттің ішінен 5-орынға тұрақтады. Ал Азия чемпионатында Жапония мемлекетінен кейін екінші орынға ие болдық. Бұл біз үшін үлкен мақтаныш. Алдағы уақытта каратэ спорт түрін дамыту мақсатында қолдан келгеннің бәрін жасаймыз, - деді Қазақстан каратэ-до WKF федерациясының вице-президенті Болат Хавлахат.

Елорда әкімдігінің ресми сайтының мәліметінше, каратэ-до WKF спорт түрін Қазақстан Республикасында бұқаралық дамыту арқылы көпшілікке тарату мен спортшылардың спорттық шеберлігін жоғарылату жарыстың басты мақсаты мен міндеті болып саналады.

Бүгінгі Қазақстан Республикасының чемпионатындағы әрбіріміздің басты мақсатымыз – бірінші орынға ие болу, чемпион атану. Еліміздің әр өңірінен келген қарсыластарым осал емес, мықты спортшылар жетерлік. Олардың қайсысы болмасын жеңімпаз атануға лайықты, - деді астаналық құрама команданың спортшысы Венера Жақсыбаева.

Турнирде алтын жүлдеге ие болған спортшылар әлем чемпионатына тікелей жолдама алды.