Қарағанды облысының Бұқар жырау ауданында 48 отбасы баспаналы болды

Нұр-Сұлтан, BAQ.KZ. Тәуелсіздіктің 30 жылдығына орай 48 отбасы Бұқар жырау ауданы Ботақара кентінде екі және үш бөлмелі пәтерлерге ие болды. Жаңа қоныстанушылар арасында халықтың әлеуметтік осал топтары, оның ішінде жетім балалар мен ата-анасының қамқорлығынсыз қалған балалар бар. 12 пәтерлі үйлер «Нұрлы жер» бағдарламасы бойынша салынды.

Қазақстан Президентінің тапсырмасына сәйкес тұрғын үй құрылысы жергілікті атқарушы органдар үшін басымдық болып табылады. Бүгін біз төрт үйдің 48 пәтерінің кілтін табыстаймыз, бір ай ішінде тағы екі үй тапсырылады. Сондай-ақ, келесі жылы пайдалануға беру жоспарланған төрт үйдің іргетасы қаланды, – деді аудан әкімі Сержан Аймақов.

Наталья Сычева 2014 жылдан бастап кезекте тұрды. Тұрмысқа шыққанға дейін қамқоршысы – ата-әжесінің үйінде, кейін жалдамалы баспанада тұрған. Енді жас отбасы өздерінің екі бөлмелі пәтерінде тұратын болады.

Бізге пәтер ұнады, кең, жарық, күн жағында орналасқан. Екі бөлмелі үйде жақсы жөндеу жасалған. Барлығы жұмыс істейді. Біз бақыттымыз. Бұған дейін күйеуіммен пәтер жалдап тұрдық, бұл қаржыға қатты әсер етеді. Енді біз не үшін төлейтінімізді білеміз, өмір сүріп, қуанатын боламыз, – дейді Наталья.

Пәтер кілттерін алғандардың арасында 81 жастағы Алтай Шамхай бар. Ол әйелімен бірге 15 жыл баспана күтті.

Біз мемлекеттің осындай көмек көрсетіп жатқанына ризамыз. Балалар бар, әрине, олардың үйінде де тұрдық, бірақ мен өз бұрышым болғанын қаладым, – деп бөлісті Алтай Шамхай.

2021 жылы Бұқар жырау ауданында тұрғын үй кезегінде тұрған 170-ке жуық отбасы пәтер алды.