Қала кадастры инфрақұрылымдық деректерінің бірыңғай геопорталы таныстырылды

Нұр-Сұлтан, BAQ.KZ. Қала құрылысын жоспарлау республикалық орталығында ҚР Индустрия және инфрақұрылымдық даму министрі Бейбіт Атамқұловқа және кеңеске қатысушыларға қала құрылысы кадастрының инфрақұрылымдық деректерінің бірыңғай геопорталының жобалық мүмкіндіктері таныстырылды.

Бұл туралы ҚР ИИДМ баспасөз қызметі хабарлады.

Геопортал инженерлік коммуникациялардың цифрлық деректерін, цифрлық бас жоспарларды және егжей-тегжейлі жоспарлауды қамтиды. Болашақта ол елді мекендерді салу жөніндегі қызметті бақылау үшін қала құрылысы регламенттері мен инфрақұрылымның салалық есепке алу жүйесіне айналмақ.

Кеңеске қатысушылар мемлекеттік қала құрылысын жоспарлау жүйесінің жұмысын, аумақты дамытудың ағымдағы мәселелерін және өңірлердегі инженерлік коммуникацияларды цифрландыру деңгейін талқылады.

Қазір қала құрылысы кадастры ел аумағының шамамен 60%-ның (аудан орталығы деңгейіне дейін) цифрлық инженерлік коммуникацияларын қамтиды.

Кеңес қорытындысында министр өңірлік геопорталдармен және жылжымайтын мүліктің бірыңғай мемлекеттік кадастрымен интеграциялық жұмыстарды аяқтауды, Көкшетау және Павлодар қалаларында қала құрылысы кадастрының деректерін үздіксіз өзектендіруді енгізудің пилоттық жобасын іске асыруды, сондай-ақ қала құрылысына жаңа стандарттарды енгізуді және жобаларды қала құрылысы сараптамасы жүйесін ескере отырып, функционалын кеңейтуді тапсырды.