Интернеттегі ойындар: Балалардың қауіпсіздігін қалай қамтамасыз етуге болады?

Оқу-ағарту министрлігінің Балалардың құқықтарын қорғау комитеті ата-аналарды интернеттегі ойындардан балаларға төнетін мүмкін қауіптер туралы ескертті, деп хабарлайды BAQ.KZ тілшісі.

Құрметті ата-аналар! ҚР Оқу-ағарту министрлігінің Балалардың құқықтарын қорғау комитеті сіздерді балаларыңыз ойнайтын ойындарға назар аударуға шақырады. Халықаралық және отандық БАҚ-та алаңдататын ақпараттар жарияланып жатыр: қаскөйлер ойыншының кейпінде балалармен сенімді қарым-қатынас орнатуға тырысып, оларды жабық чаттарға шақырады және заңға қайшы әрекеттерге тартуы мүмкін, – деп атап өтті ведомство.

Комитет балаларды интернеттегі қауіптерден қорғау үшін ата-аналарға негізгі ережелер мен қауіптің белгілерін білу маңызды екенін еске салады.

Бала интернетте не істемеуі керек?

• Жеке деректерін (аты-жөні, мекенжайы, телефоны, отбасы жайлы мәлімет) бөліспеу;
• Instagram, Telegram, TikTok, ВКонтакте сияқты желілердегі қауіпті топтарға және анонимді чаттарға кірмеу;
• Ата-ананың рұқсатынсыз күмәнді онлайн-ойындар ойнамау.

Ата-аналар баласының әрекетін қалай бақылай алады?

• Ата-ана бақылауын орнату (Android үшін Family Link, iOS үшін Screen Time);
• Баланың достар тізімі мен әлеуметтік желідегі жазылуларын қадағалау;
• Түсініксіз таңбалар, иероглифтер немесе оғаш суреттер қойылған анонимді парақшаларға назар аудару.

Қандай мінез-құлыққа мән беру керек?

• Бала нашар ұйықтайды, түнде жиі оянады;
• Денесінде түсініксіз жарақаттар (кесік, көгерген іздер) пайда болады;
• Өз-өзіне тұйықталып, агрессия танытады, қарым-қатынастан бас тартады;
• Депрессивті немесе агрессивті мазмұндағы видеолар көреді;
• Қорқынышты белгілер мен суреттер салады, бірақ түсіндірмейді.

Балаға қалай көмектесуге болады?

• Оның эмоционалдық жағдайын мұқият қадағалау;
• Үнемі сөйлесіп, өміріне қызығушылық таныту;
• Баланың кез келген уақытта ойымен бөлісе алатынын сезінуіне жағдай жасау.

Қайда жүгінуге болады?

• Құқық қорғау органдарына (102);
• Мектептегі педагог-психологқа;
• Мектептің ата-аналарға арналған педагогикалық қолдау орталығына;
• Балаларды психологиялық қолдау орталығына;
• Балалар құқықтары жөніндегі аймақтық уәкілге;
• "111" нөміріне — тәулік бойы жұмыс істейтін балаларға арналған тегін байланыс орталығы.