Илон Маск ұйымдастырған байқаудың финалисі ИИДМ басшысына электромобилін көрсетті

PHOTO
16 Ақпан 2021 2021, 10:37 1615

Нұр-Сұлтан, BAQ.KZ. Индустрия және инфрақұрылымдық даму министрі Бейбіт Атамқұлов америкалық бизнесмен Илон Маск ұйымдастырған Not-A-Boring Competition байқауына қатысушы Санжар Тайжанмен кездесті. Өнертапқыш министрге өзінің жаңа жобасы - қазақстандық электромобильді таныстырды.

Министрлік таратқан ақпаратқа сәйкес, Санжар Тайжан өз командасымен бірге бензинмен жүретін автомобильдерді батареямен қозғалатын электр көліктері етіп, қайта жаңғыртады. Қазақстандық өнертапқыш көліктің прототипін министрге көрсетіп, ерекшеліктері туралы айтып берді.
Қазір электр көлігі жақсы ауа райында 100 шақырымнан астам қашықтыққа жүре алады. Ал біз оны 500-600 шақырымға дейін арттыра аламыз. Басты мақсатымыз - электромобильдердің алғашқы қазақстандық брендін жасау. Жақын арада дизайны мүлдем жаңа 30 прототип әзірлеп, модельге 200-ден астам патент алуды жоспарлап отырмыз, - дейді Санжар Тайжан.

Стартап ең алдымен таксиді қоса алғанда еліміздегі қоғамдық көлікті электр түріне ауыстыруды көздейді.



Министр Бейбіт Атамқұлов табиғатты сақтауға және жаңартылатын қуат көздерін пайдалануға ықпал ететін жаңа технологияларды дамытуды қолдаудың маңыздылығын атап өтті.

ИИДМ мен Санжар Тайжанның компаниясы жобаны іске асыру үшін бірлесіп инвесторлар іздестіруді жоспарлап отыр. Сондай-ақ министрлік стартапты дамытуға және оның өнімдерін ілгерілетуге жәрдемдеседі.

Бөлісу:
Қысқа да нұсқа. Жазылыңыз telegram - ға

#Илон Маск #ақпарат
BAQ.KZ
Алдыңғы жаңалық
Жол картасының іске асырылу барысын өзім бақылаймын. Мамин штаб жұмысы туралы
Келесі жаңалық
Исландияда жанартау атқылады
Өзгелердің жаңалығы