ХАМАС 4 тұтқынның денесін Қызыл Крестке тапсырды

ХАМАС қаза тапқан төрт тұтқынның денесін бітім аясында Қызыл Крест ұйымына тапсырды, деп хабарлайды BAQ.KZ.

ВВС таратқан мәліметке сәйкес, құрбан болғандардың арасында екі ұлы мен анасының мәйіті бар.

Олар – Израильде 7 қазандағы трагедияның символына айналған ұл балалар Ариэль мен Кфир Бибас, олардың анасы Шири, сондай-ақ 83 жастағы Одед Лифшиц.

ХАМАС құрбандардың денелері салынған табытты Қызыл Крест ұйымына табыстады. Қара табыттың әрқайсысына тұтқындардың кішігірім фотосуреті жабыстырылған. Қызыл Кресттің автокөліктері өз кезегінде табыттарды Газа секторы аумағында ЦАХАЛ-дың әскерлеріне берді.

Израильге жеткізілген соң құрбандардың жеке басын анықтау үшін сараптама жасалынады деп күтілуде.

ХАМАС 2023 жылы 7 қазанда Израильмен қақтығыстан соң Газада соғыс басталғалы қаза тапқандардың денесін табыстайды.