"Ғылыми тұрғыда дұрыс шешім". Үкімет қазіргі уақыт белдеуін қолдайды

Үкімет уақыт белдеуіне қатысты шешімді қолдайды. Бұл туралы Үкімет отырысында Премьер-министр Олжас Бектенов мәлім етті, деп хабарлайды BAQ.KZ тілшісі.

Сауда министрі өз баяндамасында қолданыстағы уақыт белдеуіне қатысты жан-жақты дәлелдерді келтіре отырып нақты жауап берді. Үкімет бұл шешімді қолдайды. Біз бірыңғай уақыт белдеуіне бекерден-бекер ауысқан жоқпыз. Ел аумағының көп бөлігі 5-ші уақыт белдеуінде орналасқан. Сондықтан ғылыми тұрғыдан бұл дұрыс шешім. Сауда және Ақпарат министрліктеріне жан-жақты ақпараттық түсіндіру жұмыстарын жүргізуді тапсырамын, - деді Үкімет басшысы.

Бұған Сауда министрі Арман Шаққалиев Қазақстан неге 5-ші уақыт белдеуіне көшкенін түсіндірді.

Өздеріңіз білетіндей, осы жылы 19 қаңтарда "Уақытты есептеу тәртібі туралы" Үкімет қаулыға өзгеріс енгізу арқылы, ел аумағында UTC+5 сағат белдеуін қолдану туралы шешім қабылдады. Бұл шешім – Қостанай және Қызылорда облыстары азаматтарының бірнеше жыл бойы осы мәселені көтерген көптеген өтініштерін ескере отырып қабылданды, - деді министр.

Сондай-ақ уақыт белдеуі өзгертілмей тұрып, Арман Шаққалиев Шығыс Қазақстанға барғанын айтады. Министрдің сөзінше, ғылыми негіздегі шешімді халықтың жартысы қолдаған. 

Бұған дейін хабарлағанымыздай, маман уақыт белдеуі өзгеруінің адам денсаулығына әсері туралы айтты.