Алматы әкімдігі сәулеттік ғимараттардың дизайн-кодын әзірлейді

Алматы, BAQ.KZ. Алматыдағы өңірлік коммуникация қызметі алаңында "Алматы қаласының ерекше мәртебесі туралы" Заңы аясында қала құрылысы саласын дамытудың перспективалары сөз етілді.

Еске салсақ, 2019 жылдың 28 желтоқсанында Қасым-Жомарт Тоқаев "Алматы қаласының ерекше мәртебесі туралы", "Жергілікті мемлекеттік басқару мен өзін-өзі басқару туралы", "Сәулет, қала құрылысы және құрылыс қызметі туралы" заңдарға енгізілген өзгерістер мен толықтыруларға қол қойған болатын.

Қалалық жоспарлау және урбанистика басқармасының басшысы Алмасхан Ахмеджановтың айтуынша, Алматы қаласы аумағында жүзеге асуы тиіс өзгертулер қала құрылысы регламенттеріне орай дизайн-кодты, қалалық жоспарлау жүйесін, сонымен қатар қала аумағына сәулеттік безендірудің жеке жүйесін енгізуді қамтиды.

Аталған нормативтік талаптар Алматы қаласының сәулеттік кеңістігін сақтау үшін тиісті стандарттар құруға, ғимараттарды сәулет ескерткішіне жатқызу үшін ереже әзірлеуге, сонымен қатар санитариялық-аймақты ескере отырып, олардың сақталуын (ғимарат алаңындағы аймақты дамыту сәулет стиліне сай болуы тиіс) қамтамасыз етуге мүмкіндік береді, - дейді Алмасхан Ахмеджанов. 

Ол ескерткіштердің 130-дан 300-ге дейін артқанын айта келе, биыл қосымша нысандарды сәулет ескерткіштерінің тізбесіне енгізу үшін қоғам өкілдерімен талқылаулар өтетінін жеткізді.

Өз кезегінде дизайн-код Алматы қаласының аумағында ғимараттардың қасбеттеріне, жазғы алаңдарға, кіші сәулет пішініндегі объектілерге қойылатын талаптарды жүйелейді, әрі оларды орналастыруды реттейді. Сонымен қатар, заңға қажетті инфрақұрылымдық коммуникация жүргізілетін алаңдардың сызбасын (бұрындары сауда алаңдары берілген өтінішке орай орналастырылатын) талап ету енгізілген.

Регламенттер бір айдан соң жұртшылықтың кеңінен талқылауына ұсынылады.