Германия туристер үшін COVID-19-ға міндетті тестілеу ережесін енгізді

Нұр-Сұлтан, BAQ.KZ. Германия бүгіннен бастап коронавирустық инфекция қаупі жоғары елдер мен аймақтардан оралған барлық саяхатшыға COVID-19-ға қарсы міндетті тестілеуден өту ережесін енгізді. 

Deutsche Welle хабарлағандай, бұл шара сау адамдарға карантиннен құтылуға мүмкіндік береді.

ГФР Денсаулық сақтау министрі Йенс Шпанның айтуынша, бірқатар саясаткер бұл шешімге наразы болғанына қарамастан, тексерілу саяхатшылар үшін тегін болады. Қоғамдық денсаулық сақтау жүйесіне шамадан тыс жүктеме түсу жағдайының алдын алу үшін олар тестілеуден өтетіндердің әрқайсысына жеке шот қоюды ұсынды.

Қазіргі уақытта экспресс-талдау жүргізу үшін барлық қажетті жабдық елдің көптеген халықаралық әуежайында орнатылған.

Шпанның айтуынша, тесттің теріс нәтижесі адамдарға екі аптаға оқшауланбастан қалыпты өмір сүруге мүмкіндік береді. Осы уақытқа дейін елге қауіпті аймақтардан келген барлық адам үшін карантин міндетті болса да, ГФР билігі адамдардың үйде отыруын немесе оны тастап кетуін бақылау мүмкін емес екенін мойындайды.

Айта кету керек, қауіпсіз деп танылған елдерден келгендер де COVID-19-ға арналған тесттен тегін өте алады. Ол үшін олар шекарадан өткеннен кейін 72 сағат ішінде ең жақын медициналық орталыққа хабарласуы керек.

Қазіргі уақытта қауіпті деп танылған елдер мен аймақтардың тізіміне Люксембург, Каталония, Наварра және Арагон испан автономиялары, Балқан елдері, АҚШ, сондай-ақ Латын Америкасы, Африка және Азия елдерінің көпшілігі кіреді.