Футзал: «Қайрат» элиталық кезеңді жеңіспен бастады

Алматылық «Қайрат» футзалдан франциялық Этуальға қарсы ойында 4:2 есебімен жеңіске жетті, деп хабарлайды BAQ.KZ.

Бірінші таймда испаниялық маман Марлон Веласко жаттықтыратын «Қайраттың» (капитаны Біржан Оразов) ойыншылары бірден шабуылға шықты. 2-минутта әдемі ұйымдастырылған шабуылдан кейін Эдсонның пасынан соң Денер Родриго есеп ашты. 9-минутта Эдсонның өзі есепті 2:0-ге жеткізді.

Екінші кезеңде 26-минутта «Этуаль» сапынан Суфиан Эль-Месрар көзге түсті. Дегенмен 31-минутта Жулио Занотто қақырата тепкен доп қақпада тулап жатты — 3:1. 37-минутта «Қайрат» ойыншыларының қателігін Абдессамад Мохаммед пайдаланғанымен, Кевин Арриета қарымта гол соқты — 4:2.

Чемпиондар лигасының элиталық кезеңінде әр топтан бір ғана команда келесі турға жолдама алады.