Эвакуациялық пунктердегі балаларға мерекелік іс-шара ұйымдастырылды

Атырау қаласында эвакопункттеріндегі балаларға мерекелік іс-шара ұйымдастырылды, деп хабарлайды BAQ.KZ ТЖМ баспасөз қызметіне сілтеме жасап.

Балаларды қорғау күні қарсаңында, ТЖД қызметкерлері Талдыкөл ауылынан эвакуацияланған балаларға мерекелік іс-шара ұйымдастырды. 

Іс-шара «APEC PetroTechnic» колледжінің ауласында өткізілді. 

Бүлдіршіндер өрт сөндіру автокөліктеріне отырып, олардың ерекшеліктерімен, өрт сөндірушінің жауынгерлік киімдерімен, құтқарушылардың авариялық-құрал жабдықтарымен және қауіпсіздік ережелерімен танысты. 

Құтқарушы ит Оллиді көрген бүлдіршіндер шынайы қуаныштарын жасырмады. 

Шара соңында Апаттар медицинасы орталығының психологы командалық ойын элементтерімен тренинг өткізді. Мерекелік іс-шараға Талдыкөл ауылынан эвакуацияланған 133 бала қатысты, - делінген хабарламада.