Еуроодақ: "Украинаға әскери көмекті екі есе көбейтеміз"
АҚШ президенті Дональд Трамп ресейлік әріптесі Владимир Путинді Киевпен тез арада бітімге келуге көндіре алмаса, ЕО елдері Украинаға әскери көмекті айтарлықтай арттыруы мүмкін. Бұл туралы Еуропалық қорғаныс істері жөніндегі комиссары Андриус Кубилиус мәлімдеді, деп хабарлайды BAQ.KZ DW басылымына сілтеме жасап.
Оның айтуынша, Еуроодақ пен АҚШ осы уақытқа дейін Киевке жылына 40 миллиард еуроға жуық әскери көмек көрсетті, бірақ бұл қаражатты украиналық өндірушілерден арзанырақ қару сатып алуға бағыттау арқылы тиімдірек пайдалануға болады.
Бұл Украинаның дәл осындай 40 миллиард еуроға алатын қару-жарақ көлемін екі есеге көбейтеді. Біздің қолдауымыздың нақты құны 80 миллиард еуроға дейін өседі, - деді Кубилиус.
Еурокомиссар Еуроодақ елдерінің Украинаға көмектесетін жаңа құралы бар екенін еске салды: олар Киевке әскери сатып алуды қаржыландыру үшін қорғаныс несиелерін пайдалана алады.
Міне, "Бейбітшілік күш арқылы" формуласы іс жүзінде дәл осылай жұмыс істей алады. Несиелер – Украина үшін күш! – деп баса айтты Кубилиус.
Басылым атап өткендей, биыл ЕО-да қабылданған ауқымды қайта қаруландыру жоспары аясында Еурокомиссия қару-жарақты бірлесіп сатып алу мен өндіруді жедел қамтамасыз ету мақсатында 150 миллиард еуро көлемінде несие бөледі. Жаңа қаржылық мүмкіндіктер ЕО елдеріне Украинадағы қару-жарақ өндірісіне инвестиция салуға немесе украиналық әскери-өнеркәсіп кешенінің еуропалықпен интеграциясын қамтамасыз ету үшін жергілікті компаниялармен бірігуге мүмкіндік береді.
Бұған дейін The Washington Post еуропалық шенеуніктерге сілтеме жасай отырып, Еуропадағы қару-жарақ қоры үш жыл бойы соғыс кезінде айтарлықтай қысқарғандықтан, Еуропалық Одақ елдері қаруды тікелей жеткізудің орнына Украинаның қорғаныс өнеркәсібіне инвестиция салуды қарастырып жатқанын жазған.
Еуропалық Одақ Киевке гаубицаларды өндіру үшін бір миллиард еуро аударып үлгерді. Нәтижесінде Украина НАТО-ның 155 мм калибрлі бірінші болып өздігінен жүретін және сүйретілетін «Богдан» гаубицасын шығаруды жолға қойды. Оларға арналған құрамдас бөліктердің 85 пайыздан астамы жергілікті кәсіпорындарда шығарылады, бірақ жыл соңына дейін бұл көрсеткіш 95 пайызға дейін өседі, – деп болжайды Украина Қорғаныс министрлігінің қорғаныстық сатып алу жөніндегі агенттігінің басшысы Арсен Жумадилов.
Оның айтуынша, жергілікті өндіріс ауқымы Еуропада теңдесі жоқ: еуропалық серіктестермен ынтымақтастықтың арқасында ай сайынғы өндіріс 2023 жылғы алты гаубицадан биыл 20-ға дейін өсті.